अनसन तोडेकोमा आलोचना भएपछि सोनम वाङचुकले भने– धिक्कार छ तिमीहरूलाई

नयाँ दिल्ली । आफ्नो अनसन अन्त्य गर्ने निर्णयलाई लिएर सामाजिक सञ्जालमा आलोचना भएपछि सोनम वाङचुकले भिडियो सन्देश सार्वजनिक गरेका छन् । उक्त सन्देशमा उनले सरकारसँग कुनै पनि सहमति नभएको र जन्तर मन्तरमा रहेका विद्यार्थी तथा प्रदर्शनकारीहरूमाथि कारबाही हुनसक्ने डरले मात्रै आफूले अनसन अन्त्य गरेको प्रस्टीकरण दिएका हुन् ।

उनले शुक्रबार राति करिब साढे १२ बजे केन्द्रीय मन्त्रीहरू जेपी नड्डा र जितेन्द्र सिंह, आफ्नी श्रीमती तथा लद्दाखको नागरिक समाजका प्रतिनिधिको उपस्थितिमा अनसन तोडेका थिए ।

सो क्रममा जेपी नड्डाले उनलाई २८ दिनका लामो अनसन तोड्नका लागि जुस पिलाएका थिए । जसको यतिखेर तीव्र आलोचना भइरहेको छ ।

त्यसपछि आफ्नो भिडियो सन्देशमा सोनम वाङचुकले भने, ‘म दुःख, आश्चर्य, पीडा र आक्रोशको मिश्रित भावनाका साथ यो भिडियो बनाउँदै छु । आफ्ना भाइबहिनी अर्थात् विद्यार्थीहरूका लागि २६ दिनसम्म अनसन बस्दा मेरो शरीरको तौल र मांसपेशी ११ किलोग्रामले घटेको छ तथा मेरा अंग र मस्तिष्कमा अपूरणीय क्षति पुग्ने अवस्था सिर्जना भएको छ, साथै लद्दाखको कडा जाडोबाट दिल्लीको प्रचण्ड गर्मीसम्मको यो परिवर्तनलाई झेलेपछि के मेरो आमरण अनसनको पवित्रताबारे कसैबाट ‘चरित्र प्रमाणपत्र’ लिनु साँच्चै आवश्यक छ ?’

उनले कसको हातबाट अनसन तोडेको भन्ने व्यक्तिको बारेमा उठाइएका आरोपहरूको पनि जवाफ दिए ।

वाङचुकले भने, ‘मानिसहरूले सोधिरहेका छन् कि मैले कसको हातबाट अनसन तोडेँ । यदि मैले अनसन तोडेको भए, कसको हातबाट अनसन तोडेँ ? त्यो व्यक्तिको हातबाट किन ? यो व्यक्तिको हातबाट किन नतोड्ने ? के सम्झौता भयो ? कस्तो सम्झौता भयो ? मैले यी सबैको जवाफ दिनुपर्छ । म हिजोदेखि तरल पदार्थ सेवन गरिरहेको छु, त्यसैले मेरो शरीरमा केही शक्ति आएको छ ।’

‘दुर्भाग्यवश, यसका लागि मैले ठूलो मूल्य चुकाउनुपरेको छ, म यो कुरा निकै भारी मनका साथ भन्दैछु । यद्यपि, आज बिहानैदेखि धेरै मानिसहरूले मलाई फोन गरिरहेका छन् वा विभिन्न पोस्टहरू देखाउँदै सोधिरहेका छन् कि मेरो बारेमा किन यति धेरै प्रश्नहरू उठाइँदैछन् ।’ उनले भने, ‘तपाईंले उनीहरूको अनशन किन तोडाउनु भयो ? तपाईंले केन्द्रीय मन्त्रीहरूबाट किन यसो गराउनुभएन ? अरू कसैबाट किन गराउनुभएन ? कस्तो सम्झौता भयो ? कस्तो किसिमको सौदाबाजी गरियो ? यी सबै कुराको जवाफ मैले दिनुपर्ने भएको छ । यदि कुनै सौदाबाजी वा सम्झौता नै उद्देश्य हुन्थ्यो भने के कसैले २६ दिनसम्म भोकै बस्नुपर्थ्यो र ? वास्तवमा कति जनाले यस्ता सम्झौताहरू गरेका छन् ?’

उनले भने, ‘त्यस्तो देशलाई धिक्कार छ जसले यस्ता सोच भएका मानिसहरू जन्माउँछ, जहाँबाट यस्ता घृणित विचारहरू निस्कन्छन् । म दोष दिन्नँ, म तिमीहरूमध्ये धेरैलाई दोष दिन्न किनकी तिमीहरूसँग ज्ञानको अभाव छ, तत्कालीन परिस्थिति कस्तो थियो भन्ने कुरा तिमीहरूलाई थाहा छैन ।’