काठमाडौं । प्रधानमन्त्री बालेन्द्र साह ‘बालेन’को स्वकीय सचिवालयमा हाल २७ जना नियुक्त भएको खुलेको छ ।
प्रमुख प्रतिपक्षी नेपाली कांग्रेसकी सांसद सीता थपलिया (उर्मिला)ले प्रतिनिधि सभामार्फत सोधेको लिखित प्रश्नको जवाफमा प्रधानमन्त्री तथा मन्त्रिपरिषद्को कार्यालयले उक्त जानकारी गराएको हो ।
प्रधानमन्त्री कार्यालयका अनुसार मुख्य सल्लाहकार कुमार बेञ्जनकार (कुमार बेन) र राजनीतिक सल्लाहकार अशिम साहलाई मन्त्रीसरह सेवा सुविधा उपलब्ध गराउने गरी नियुक्त गरिएको छ ।
त्यस्तै, नीति, प्रशासन तथा सुशासन सल्लाहकार र सूचना तथा सञ्चार प्रविधि सल्लाहकारलाई राज्यमन्त्रीसरह सेवा सुविधा प्रदान गरिएको कार्यालयले जनाएको छ ।
मन्त्री तथा राज्यमन्त्रीसरह सुविधा प्राप्त सचिवालयका सदस्यहरूलाई सरकारी गाडी र चालकको सुविधा समेत उपलब्ध गराइएको छ ।
सांसद थपलियाले प्रधानमन्त्रीको सचिवालयमा नियुक्त सदस्यहरूको संख्या, उनीहरूको जिम्मेवारी तथा सेवा सुविधासम्बन्धी विवरण माग गरेकी थिइन् । त्यसको लिखित जवाफमा प्रधानमन्त्री कार्यालयले हाल सचिवालयमा २७ जना नियुक्त भएको र सचिवालयमा ४८ जनासम्म राख्न सक्ने व्यवस्था रहेको दाबी गरेको छ ।
प्रतिक्रिया