को हुन् बेलायतको नयाँ प्रधानमन्त्री बन्न लागेका एन्डी बर्नहम ?

लन्डन । बेलायतको भावी प्रधानमन्त्रीको रूपमा एन्डी बर्नहमले स्थान लिने पक्का भएको छ ।

सत्तारुढ लेबर पार्टीको नयाँ नेता बनेसँगै उनी बेलायतको प्रधानमन्त्री बन्ने बाटो खुलेको हो । सोमबार उनले बेलायतको नयाँ प्रधानमन्त्रीको रूपमा शपथ लिदैँछन् ।

बेलायतको लेबर पार्टीले शुक्रबार एन्डी बर्नहम पार्टीको नयाँ नेतामा निर्वाचित भएको घोषणा गरेको थियो । यसअघि ग्रेटर म्यानचेस्टरको मेयरका रूपमा काम गरिसकेका बर्नहमले सोमबार प्रधानमन्त्रीको जिम्मेवारी सम्हाल्ने बेलायती मिडियाले उल्लेख गरेका छन् । केइर स्टारमरको औपचारिक राजीनामा पछि स्थापित प्रक्रियाअनुसार यो प्रक्रिया अघि बढेको हो ।

खासमा तत्कालीन प्रधानमन्त्री केयर स्टार्मरले आफ्नो राजीनामाको घोषणा गरेपछि नयाँ प्रधानमन्त्री चयनका लागि बाटो खुल्ला भएको थियो । पछिल्लो दश वर्षमा बेलायतको प्रधानमन्त्री पदबाट राजीनामा दिने उनी सातौं व्यक्ति हुन् ।

बेलायती सञ्चारमाध्यमका अनुसार बेलायतकी विदेशमन्त्री इभेट कूपरले गत सोमबार स्टार्मरलाई पदबाट हट्न आग्रह गरेकी थिइन् । स्टार्मरका वरिष्ठ मन्त्रीहरू मध्येकी एक कूपरले सप्ताहन्तमा उनलाई गोप्य सन्देश पठाउँदै राजीनामा दिन आग्रह गरेकी हुन् भने बेलायतका रक्षामन्त्री जोन हिलीले स्टार्मर सरकारले रक्षा बजेट कटौती गरेको आरोप लगाउँदै राजीनामा दिएका थिए ।

को हुन् एन्डी बर्नहम ?

बेलायतका नयाँ प्रधानमन्त्री बन्न लागेका एन्डी बर्नहम बेलायतको लेबर पार्टीका एक वरिष्ठ नेता हुन् र उनी सन् २०१७ देखि ग्रेटर म्यानचेस्टरको मेयरका रूपमा पनि कार्यरत छन् ।

सन् १९७० को जनवरीमा लिभरपूलमा जन्मिएका बर्नहम उत्तर पश्चिम इङ्गल्याण्डमा हुर्के बढेका हुन् र उनले मात्र १५ वर्षको उमेरमा लेबर पार्टीको सदस्यता लिएका थिए ।

उनले क्याम्ब्रिज विश्वविद्यालयमा अङ्ग्रेजी विषयको अध्ययन गरेका थिए । बर्नहम सन् २००१ मा पहिलोपटक सांसदमा निर्वाचित भएका थिए ।

बेलायतका पूर्वप्रधानमन्त्रीहरू टोनी ब्लेयर र गोर्डन ब्राउनको नेतृत्वमा रहेका लेबर पार्टीका सरकारहरूमा उनले विभिन्न महत्त्वपूर्ण पदहरू सम्हालेको अनुभव पनि रहेको छ ।

एन्डी बर्नहम पहिलोपटक सन् २००८ मा बेलायतको संस्कृतिमन्त्री बनेका थिए भने सन् २००९ मा स्वास्थ्यमन्त्रीको पदमा पदोन्नति भएका थिए । उनले इङ्गल्याण्डको राष्ट्रिय स्वास्थ्य सेवाको जिम्मेवारी पनि सम्हालेका छन् ।

एन्डी बर्नहम लेबर पार्टीका महत्वाकांक्षी नेताहरूमध्ये एक हुन् । उनले यसअघि पार्टीको नेता बन्न दुई पटक प्रयास गरिसकेका छन् । उनले पहिलोपटक सन् २०१० मा नेतृत्वका लागि प्रतिस्पर्धा गरेका थिए तर एड मिलिब्यान्डसँग पराजित भए । त्यसपछि सन् २०१५ मा जेरेमी कोर्बिनविरुद्ध पुनः प्रतिस्पर्धा गरे पनि त्यसपटक पनि उनले हार बेहोर्नु परेको थियो ।

अहिले एन्डी बर्नहम फेरि एकपटक लेबर पार्टीको नेतृत्वका लागि प्रतिस्पर्धा गर्दैछन् र उनी चुनाव जित्नसक्ने सम्भावना पनि छ ।

एन्डी बर्नहम सन् २०१७ मा ग्रेटर म्यानचेस्टरको पहिलो निर्वाचित मेयर बन्नका लागि संसदबाट राजीनामा दिएर बाहिरिएका थिए । मेयरको कार्यकालमा उनले सार्वजनिक यातायात, आवास र रोजगारीजस्ता विषयहरूमा काम गर्दै जनसमर्थन तथा प्रशंसा कमाएका थिए ।

कोभिड १९ महामारीका बेला उत्तरी इङ्गल्याण्डलाई दिइने सहयोगका सम्बन्धमा बेलायती सरकारलाई पटकपटक चुनौती दिएपछि उनले ‘किङ अफ द नर्थ’को उपनाम पनि पाएका थिए, यो उपनाम लोकप्रिय टेलिभिजन शृङ्खला ‘गेम अफ थ्रोन्स’बाट प्रेरित थियो ।

बर्नहम सन् २०२६ मा मेकरफिल्डबाट सांसद निर्वाचित भएका हुन् । उनले भने, ‘म सम्पूर्ण बेलायत उत्तर, दक्षिण, पूर्व र पश्चिमको नेता बन्नेछु ।’

जुलाई २०२४ मा लेबर पार्टीलाई १४ वर्षयताकै पहिलो ठूलो चुनावी जित दिलाएपछि स्टार्मरले आफ्नो सरकारले अपनाएका नीतिहरूका कारण आलोचनाको सामना गर्नुपरेको थियो ।

मेकरफिल्ड उपनिर्वाचनमा भएको शानदार जितपछि लेबर पार्टीको नेताका रूपमा एन्डी बर्नहमलाई अघि सार्ने पक्षमा समर्थन बढेको थियो । जसले सफलता हासिल गरेको हो ।