प्रोटोन ई–मास ५ को बुकिङ खुला, ग्राहकले पूर्वानुमान गरेकै विशेष मूल्यमा गाडी खरिद गर्न सक्ने

काठमाडौं । नेपालका लागि प्रोटोन गाडीको आधिकारिक वितरक जगदम्बा मोटर्स प्रालिले बहुप्रतिक्षित इलेक्ट्रिक गाडी प्रोटोन ई–मास ५ को बुकिङ खुला गरेको छ भने आधिकारिक रूपमा सार्वजनिक हुनुअगावै ‘गेस एन्ड बुक द अल न्यु ई–मास ५ एट योर प्राइस’ नामक विशेष योजना सुरू गरेको छ ।

कम्पनीका अनुसार यस योजनाअन्तर्गत ग्राहकहरूले नयाँ प्रोटोन ई–मास ५ को आधिकारिक बजार मूल्य अनुमान गरी सोही मूल्यमा गाडी खरिद गर्न सक्ने मौका पाउनेछन् । कम्पनीले तोकेकै लन्च मूल्य वा लन्च मूल्यसँग सबैभन्दा नजिकको मूल्य अनुमान गर्ने ग्राहकहरूले आफूले अनुमान गरेकै मूल्यमा सो गाडी किन्न सक्नेछन् ।

यस योजनामा सहभागी हुन इच्छुकहरूले कम्पनीले जारी गरेको साइटमा गएर आफ्नो रोजाइको भेरियन्ट छनोट गरी ‘प्राइस स्लाइडर’मार्फत आफ्नो अनुमानित मूल्य लक गरी पठाउन सक्नेछन् । मूल्य अनुमानका लागि ई–मास ५ प्राइम’ भेरियन्टको दायरा २९.९९ लाख रुपैयाँदेखि ३४.९९ लाख रुपैयाँसम्म तोकिएको छ भने ‘प्रिमियम’ भेरियन्टको दायरा ३४.९९ लाख रुपैयाँदेखि ३९.९९ लाख रुपैयाँसम्म निर्धारण गरिएको छ ।

कम्पनीले उल्लेख गरे अनुसार, यस योजनामा नियमपूर्वक सहभागी भएकाहरूमध्येबाट ‘लक्की ड्र’मार्फत प्रत्येक भेरियन्ट बाट ५ जना भाग्यशाली विजेताहरू चयन गरिनेछ । विजेताहरूले यस योजनाका सर्त तथा नियमहरूको अधिनमा रही आफूले अनुमान गरेकै मूल्यमा प्रोटोन ई–मास ५ खरिद गर्न पाउनेछन् ।

यसैबीच, जगदम्बा मोटर्सले १ लाख रुपैयाँ बुकिङ रकम तोकेर प्रोटोन ई–मास ५ को बुकिङ समेत खुला गरेको छ । ग्राहकहरूले बैंक अथवा अनलाइनमार्फत भुक्तानी गरी भुक्तानीको डकुमेन्ट सेल्स कन्सलटेन्टलाई बुझाई आफ्नो बुकिङ प्रक्रिया पूरा गर्नसक्ने कम्पनीले जनाएको छ । अथवा सोही साइटमा गएर भौचर आप्लोड गरी बुक गर्न सक्नेछन् । सो साइटमा गएर बुकिङ गरेका ग्राहकको बुकिङलाई आधार मानेर लकी ग्राहक छानिने छन् ।

प्रोटोन र जिलीको सहकार्यमा विकास र उत्पादन गरिएको यो गाडीले हालसालै मलेसियाको ‘अलायान्ज डिएसएफ भिहेकल अफ द यिअर अवार्ड्स’ मा ‘इलेक्ट्रिक कम्प्याक्ट भिहेकल अफ द यिअर २०२६’ को उपाधि हासिल गरेको थियो ।

कम्पनीका अनुसार ई–मास ५ नेपालमा यसको सेगमेन्टमै पहिलो ‘रियर–ह्विल–ड्राइभ’ भएको इलेक्ट्रिक कम्प्याक्ट एसयुभी हुनेछ । यसमा प्रिमियम इलेक्ट्रिक ड्राइभिङ अनुभव प्रदान गर्न पाँचवटा प्रमुख विशेषताहरू समावेश रहने कम्पनीले उल्लेख गरेको छ ।

नेपालमा विद्युतीय सवारी साधनको बजार निरन्तर विस्तार भइरहेको र प्यासेन्जर गाडीको बिक्रीमा इभीको हिस्सा बढ्दै गएको सन्दर्भलाई ध्यानमा राखेर यो योजना ल्याइएको कम्पनीले उल्लेख गरेको छ । देशको कम्प्याक्ट इलेक्ट्रिक एसयुभी सेगमेन्टमा प्रोटोन ई–मास ५ ग्राहकहरूको लागि एक उत्कृष्ट विकल्पको रूपमा स्थापित हुनेमा जगदम्बा मोटर्सले विश्वास व्यक्त गरेको छ ।