बुद्धनगर आत्मदाह प्रयास : उपचाररत राउतको परिवारले भन्यो– भ्रामक समाचारले थप पीडा दियो

काठमाडौं । काठमाडौंको बुद्धनगरमा आत्मदाहको प्रयास गरेका ४५ वर्षीय अश्विन राउतको वीर अस्पतालमा उपचार भइरहेको छ ।

शनिबार बिहान आफ्नै घरमा शरीरमा पेट्रोल छर्केर आगो लगाएका राउतलाई परिवार, छिमेकी र स्थानीयको सहयोगमा उद्धार गरी अस्पताल पुर्‍याइएको हो ।

राउतका भाइ दीपक राउतका अनुसार बिहान करिब ६ बजेतिर घटना भएको थियो । परिवार श्राद्धको तयारीमा रहेका बेला राउतकी श्रीमती नुहाउन गएको समयमा उनले बाहिर गएर स्कुटरबाट पेट्रोल निकाली शरीरमा खन्याएर आगो लगाएको उनले बताए ।

घटनापछि छिमेकी, होस्टेलमा बस्ने युवाहरू र परिवारका सदस्यको सहयोगमा आगो निभाई राउतलाई तत्काल अस्पताल लगिएको दीपकले जानकारी दिए ।

उनले भने, ‘बिहान करिब ६ बजेतिर भाउजु, दाइ आफू नुहाईधुवाई गरेर श्राद्धको लागि तयारी गर्दै हुनुहुन्थ्यो । भाउजु नुहाउन पसेको बेलामा दाइले चाहिँ बाहिर गएर स्कुटरबाट पेट्रोल झिकेर अनि त्यहाँबाट आफूलाई खनाएर आगो लगाउनुभएछ । अनि बाहिर ड्याङ्ग डुडुङ्ग भएपछि भाउजु निस्केर हेर्दाखेरि आगो लागिरहेको । छिमेकीको सहयोग, होस्टेलको केटाहरुको सहयोग र दाइहरु मिलेर र प्रहरीलाई खबर गरेर अनि हामीले हस्पिटल लिएर आएका हौँ ।’

उनका अनुसार राउतको एक वर्षअघि स्पाइनल कर्डको शल्यक्रिया गरिएको थियो । शल्यक्रियापछि स्वास्थ्यमा सुधार अपेक्षाअनुसार हुन नसक्दा उनी मानसिक तनावमा रहेको परिवारले महसुस गरेको थियो ।

‘उपचारलाई थप अघि बढाउने तयारी भइरहेको थियो । तर, त्यसअघि नै उहाँले यस्तो कदम चाल्नुभयो,’ दीपकले भने ।

यसैबीच, घटनालाई पारिवारिक विवादसँग जोडेर केही सञ्चारमाध्यममा आएका समाचारप्रति परिवारले असन्तुष्टि जनाएको छ ।

दीपक राउतले घटनाको वास्तविकता नबुझी अनुमानका आधारमा समाचार प्रकाशन हुँदा परिवारलाई थप मानसिक पीडा भएको बताए । उनले हरेक घटनाको प्रकृति फरक हुने भएकाले तथ्य पुष्टि गरेर मात्र समाचार सम्प्रेषण गर्न सञ्चारमाध्यमसँग आग्रह गरेका छन् ।

भाइ दीपकले भने, ‘हामी यतिबेला अत्यन्तै ठूलो शोक र मानसिक पीडामा छौँ । यस्तो संवेदनशील घडीमा आधारहीन कुरा लेखेर परिवारलाई थप मानसिक तनाव नदिन र समाचारमा संयमता अपनाउन आग्रह गर्दछौँ ।’

उनले जिम्मेवार पत्रकारिताको आवश्यकता औँल्याउँदै झुटा र भ्रामक समाचार तत्काल सच्याउन समेत सम्बन्धित पक्षसँग माग गरेका छन् ।

उनले भने, ‘यो बीचमा न्यूज, अनलाइन न्यूजहरुले चाहिँ अननेसेसरी (अनावश्यक) नचाहिँदो कुराहरु पारिवारिक झगडा, यो भनेर गर्ने र पहिलाका घटनाहरुलाई पनि लिंक गरेर राजनीतिकरण गर्ने, यो कुराहरुले चाहिँ परिवारलाई अझै दुखी बनाएको छ । यो यस्तो खालको परिपाटीले चाहिँ सबै न्यूज एकैथरी हुँदैन । सबै घटना एकैथरी हुँदैनन् भन्ने कुरा चाहिँ न्यूज च्यानल चलाउने मान्छेहरुले पनि बुझिदिनुपर्‍यो । उहाँहरुले गर्दाखेरि हामीलाई थप समस्या भएको छ । हामीलाई मानसिक तनाव भएको छ ।’

परिवारका अनुसार हाल राउतको उपचार भइरहेको छ र चिकित्सकको निगरानीमा उनको स्वास्थ्य अवस्थाबारे मूल्यांकन भइरहेको छ ।