चितवन । चितवनको भरतपुर महानगरपालिकाको वडा नम्बर १९ स्थित ऐतिहासिक दासढुंगामा नेकपा (एमाले)का तत्कालीन महासचिव जननेता मदन भण्डारीको स्मृतिमा ‘मदन भण्डारी पार्क’ निर्माण भइरहेको छ ।
नेपालको कम्युनिष्ट आन्दोलनका प्रभावशाली नेता भण्डारीको निधन भएको स्थललाई संरक्षण गर्दै इतिहासलाई जीवन्त राख्ने उद्देश्यले पार्क निर्माणको काम अघि बढाइएको हो । पार्क निर्माणसँगै दासढुंगा क्षेत्रलाई पर्यटकीय तथा ऐतिहासिक गन्तव्यका रूपमा विकास गर्ने लक्ष्य राखिएको छ ।
वि.सं. २०५० जेठ ३ गते तत्कालीन महासचिव भण्डारी र संगठन विभाग प्रमुख जीवराज आश्रित चढेको जीप चितवनको दासढुंगाबाट त्रिशूली नदीमा खसेको थियो । उक्त दुर्घटनामा दुवै नेताको निधन भएको थियो ।
नेपालको राजनीतिक इतिहासमा चर्चित दासढुंगा घटनाले लामो समयसम्म विभिन्न बहस र अनुसन्धानको विषय बन्दै आएको छ । यही ऐतिहासिक घटनास्थललाई संरक्षण गर्दै भावी पुस्तालाई त्यस समयको राजनीतिक इतिहासबारे जानकारी गराउने उद्देश्यले स्मृति पार्क निर्माण सुरु गरिएको हो ।
पार्क निर्माणमा सक्रिय मधु गुरुङका अनुसार दासढुंगा क्षेत्रलाई व्यवस्थित स्मृति तथा पर्यटकीय स्थलका रूपमा विकास गर्ने उद्देश्यले पूर्वाधार निर्माणलाई प्राथमिकता दिइएको छ । उनका अनुसार यसअघि दासढुंगा आउने पर्यटकका लागि आवश्यक सुविधा अभाव थियो । त्यसलाई सुधार गर्दै पर्यटकमैत्री संरचना निर्माण भइरहेको छ ।
यस्तै, मदन भण्डारी फाउण्डेसन पार्क निर्माण समितिका अध्यक्ष नारायणकुमार मगरका अनुसार पार्क निर्माणको मुख्य काम करिब साढे दुई महिनाको अवधिमा सम्पन्न भएको हो । निर्माण सम्पन्न भए पनि केही भुक्तानी प्रक्रिया तथा सामान्य रेखदेखका काम भने बाँकी रहेको उनले जानकारी दिए ।
पार्क ४१ लाख रुपैयाँको लागतमा बनेको हो, बजेट प्रदेशबाट विनियोजन भएको अध्यक्ष मगरले बताए । मगरका अनुसार पार्कमा एउटा पुल, दुई वटा गोलघर, कम्पाउण्ड, पानी ट्याङ्की, शौचालय, फुल राख्ने स्थान तथा कार्यालय भवन निर्माण गरिएको छ । कार्यालय भवनको केही काम अझै बाँकी रहेपनि पार्कका मुख्य संरचना भने तयार भइसकेका छन् ।
पार्कमा आउने जाने नागरिकको सहजताका लागि नारायणी किनारसम्म पुग्ने सिँढी निर्माण गरिएको छ भने मदन भण्डारी र जीवराज आश्रितको सालिकसहित विभिन्न स्मृति संरचना निर्माण गरिएको अध्यक्ष मगरले बताए । यसअघि सामान्य अवस्थामा रहेको क्षेत्रलाई अहिले व्यवस्थित र आकर्षक बनाइएको उनको भनाई छ ।
‘पहिले यहाँ त्यस्तो व्यवस्थापन थिएन, अहिले नयाँ संरचनाहरू निर्माण गरेर व्यवस्थित बनाइएको छ,’ अध्यक्ष मगरले भने । उनका अनुसार पार्क क्षेत्रमा दुबो तथा हरियाली व्यवस्थापन, सौन्दर्यीकरण र आवश्यक पूर्वाधार थप गरेर क्षेत्रलाई पर्यटकीय आकर्षणको केन्द्र बनाउने काम गरिएको छ ।
दासढुंगा क्षेत्रलाई राजनीतिक इतिहास, अध्ययन र आन्तरिक पर्यटनसँग जोड्ने उद्देश्यसहित निर्माण गरिएको यस पार्कले स्थानीयस्तरमा रोजगारी सिर्जना गर्नुका साथै चितवनको पर्यटन प्रवर्द्धनमा समेत सहयोग पुग्ने अपेक्षा गरिएको छ ।
स्थानीयबासीले पनि दासढुंगा दुर्घटनास्थल मात्र नभई नेपालको राजनीतिक इतिहास बोकेको महत्वपूर्ण क्षेत्र भएकाले पार्क निर्माणले यसको पहिचान अझ बलियो बनाउने विश्वास व्यक्त गरेका छन् ।
मदन भण्डारी नेपाली राजनीतिमा जनताको बहुदलीय जनवादका प्रतिपादकका रूपमा परिचित नेता हुन् । उनको विचार, नेतृत्व र योगदानको स्मरण गर्दै निर्माण गरिएको मदन भण्डारी फाउण्डेसन पार्क भविष्यमा राजनीतिक अध्ययन, ऐतिहासिक अवलोकन र पर्यटनको महत्वपूर्ण केन्द्र बन्नसक्ने सरोकारवालाहरूले विश्वास गरेका छन् ।
प्रतिक्रिया