भेनेजुएला भूकम्प : ८ दिनपछि भग्नावशेषबाट जीवितै निकालिए सुरक्षा गार्ड

काठमाडौं । भेनेजुएलामा दुई वटा शक्तिशाली भूकम्प गएको आठ दिनपछि एक जना सुरक्षा गार्डलाई भग्नावशेषबाट जीवितै उद्धार गरिएको छ ।

उद्धार टोलीले भत्किएको भवनको बेसमेन्टबाट ४३ वर्षीय सुरक्षा गार्ड हर्नान अल्बर्टो गिल फ्लोरेसलाई जीवितै बाहिर निकालेको हो ।

हर्नान ला गुएरास्थित ‘गालेरियास प्लाया ग्रान्डे’ सपिङ सेन्टरमा रात्रिकालीन सिफ्टका सुरक्षा गार्ड थिए । भूकम्प जाँदा हर्नान सपिङ सेन्टरभित्रै थिए ।

उनी ८ दिनदेखि भग्नावशेषमुनि फसेका थिए । करिब १०० घण्टासम्म लगातार चलेको उद्धार कार्यपछि बिहीबार बिहान सबेरै उद्धारकर्मीहरूले उनलाई सकुशल बाहिर निकालेका हुन् । जब उनलाई अक्सिजन मास्क लगाएर स्ट्रेचरमा बाहिर ल्याइयो, त्यहाँ उपस्थित मानिसहरू र विभिन्न देशका उद्धारकर्मीहरूले ताली बजाएर उनको स्वागत गरे ।

धेरै उद्धारकर्मीहरूले खुसीले एकअर्कालाई अङ्गालो हालेर भावुक बने ।

उद्धारकर्मीहरूले केही दिनअघि मात्रै पहिलोपटक हर्नानसँग सम्पर्क गरेका थिए । त्यसपछि एउटा साँघुरो बाटो हुँदै उनलाई निरन्तर रूपमा पानी र झोलिलो खानेकुरा उपलब्ध गराइएको थियो ।

भग्नावशेषको अवस्था, लगातारको वर्षा र बारम्बार आइरहने भूकम्पको कम्पनका बाबजुद उद्धार टोलीहरूले सावधानीपूर्वक सुरुङ निर्माण गरी उनलाई जीवितै बाहिर निकाले ।

भेनेजुएलाको सरकारी तथ्याङ्कअनुसार हालसम्म भूकम्पका कारण २ हजार २९५ जनाको मृत्यु भएको छ र ११ हजारभन्दा बढी मानिसहरु घाइते भएका छन् । ठूलो सङ्ख्यामा मानिसहरू अझै पनि बेपत्ता छन् भने हजारौं परिवार राहत शिविर, खुला आकाशमुनि बस्न बाध्य छन् ।