रास्वपाको महाधिवेशनमा सहभागी हुन काँग्रेस सभापति थापा आफैँ जाने

काठमाडौं । राष्ट्रिय स्वतन्त्र पार्टी (रास्वपा) को चितवनमा सुरु हुने प्रथम राष्ट्रिय महाधिवेशनको उद्घाटन समारोहमा नेपाली कांग्रेसका सभापति गगन थापा स्वयं सहभागी हुने भएका छन्।

यसअघि कांग्रेसका तर्फबाट उपसभापति डा. पुष्पा भुसाल सहभागी हुने चर्चा भए पनि अन्ततः सभापति थापाले नै उद्घाटन समारोहमा उपस्थित भई शुभकामना मन्तव्य दिने कार्यक्रम तय भएको हो।

कांग्रेस स्रोतका अनुसार देशको प्रमुख राजनीतिक दलमध्ये एक रास्वपाको पहिलो महाधिवेशन भएकाले पार्टीको उच्च तहबाटै प्रतिनिधित्व गर्नु उपयुक्त हुने निष्कर्षपछि थापाले सहभागी हुने निर्णय गरेका हुन्।

महाधिवेशनमा अन्य राजनीतिक दलबाट पनि शीर्ष तथा वरिष्ठ नेताहरूको सहभागिता रहनेछ। उद्घाटन समारोहमा विभिन्न दलका प्रतिनिधिले शुभकामना व्यक्त गर्ने कार्यक्रम रहेको रास्वपाले जनाएको छ।