तीन वटा संसदीय समितिको बैठक बस्दै

काठमाडौं । संघीय संसद्अन्तर्गत तीन वटा संसदीय समितिहरूको बैठक आज (शुक्रबार) बस्दैछ । प्रतिनिधि सभाअन्तर्गत रहेको अर्थ समिति, उद्योग तथा वाणिज्य र श्रम तथा उपभोक्ता हित समिति र राष्ट्रिय सभाअन्तर्गत रहेको विकास, आर्थिक मामिला तथा सुशासन समितिको बैठक बस्न लागेको हो ।

सिंहदरबारस्थित समितिको सभाकक्षमा बिहान ८ बजे अर्थ समितिको बैठक बस्नेछ । बैठकमा नेपाल राष्ट्र बैंकका गभर्नरसँग चालु आर्थिक वर्ष २०८२/८३ को मौद्रिक नीति कार्यान्वयनको प्रगति, बैंक तथा वित्तीय संस्थाहरूमा बढ्दो अधिक तरलता व्यवस्थापनका लागि अपनाइएका नीति तथा कार्यक्रम, तिनको प्रभावकारिता तथा सरकारी स्वामित्वमा रहेका बैंक तथा वित्तीय संस्थाहरूको पछिल्लो तीन वर्षको कार्यसम्पादनबारे जानकारी लिने कार्यसूची छ ।

यसैगरी, बैंक तथा वित्तीय क्षेत्रसँग सम्बन्धित नीतिगत तथा कानुनी सुधारका विषयमा पनि समितिले गभर्नरसँग छलफल गर्नेछ ।

यस्तै, उद्योग तथा वाणिज्य र श्रम तथा उपभोक्ता हित समितिको बैठक बिहान ९ः१५ बजे बस्नेछ । सिंहदरबारस्थित समितिको सभाकक्षमा हुने बैठकमा समितिको आन्तरिक कार्यविधिका सम्बन्धमा छलफल गरिने कार्यसूची रहेको छ ।

त्यसैगरी, बिहान १० बजे विकास, आर्थिक मामिला तथा सुशासन समितिको बैठक बस्दैछ । बैठकमा ऊर्जा, जलस्रोत तथा सिँचाइ मन्त्रालयको आगामी आर्थिक वर्ष २०८३/८४ को बजेट तथा वार्षिक कार्यक्रमबारे छलफल हुने कार्यसूची रहेको छ ।