काठमाडौं । नेपाल टेलिकमले फिफा विश्वकप २०२६ लाई लक्षित गर्दै फिफा विश्वकप २०२६ ‘टिभी प्याकेज’ उपलब्ध गराएको छ । कम्पनीले यससम्बन्धी कुनै समस्या वा गुनासो भएमा २४सै घण्टा सोधपुछ तथा ग्राहक सेवाका लागि सम्पर्क नम्बरको व्यवस्था समेत गरेको छ ।
कम्पनीका अनुसार, प्याकेज खरिदको क्रममा कुनै समस्या भएमा वा यससम्बन्धी कुनै गुनासो भएमा १९८ नम्बरमा सम्पर्क गर्न सकिन्छ ।
त्यसैगरी, प्याकेज खरिदसँग सम्बन्धित गुनासो सम्बोधनको लागि वैकल्पिक नम्बरको रुपमा ०१५९७००१९ मा समेत सम्पर्क गर्न सकिन्छ । प्राप्त गुनासोहरुलाई प्राथमिकतामा राखी सम्बोधन गर्ने व्यवस्था मिलाइएको टेलिकमले जनाएको छ ।
फिफा विश्वकप २०२६ ‘टिभी प्याकेज’अन्तर्गत सम्पूर्ण एनटीटिभी ग्राहकहरूले ९९९ रुपैयाँमा सो प्याकेज खरिद गरी विश्वकपका रोमाञ्चक खेलहरूको प्रत्यक्ष प्रसारण हेर्न सक्नेछन् ।
कम्पनीका अनुसार वार्षिक १०० एमबीपीएस वा सोभन्दा बढी गतिको प्रिमियम आईपीटिभी प्याकेजको साथ इन्टरनेट नयाँ जडान गर्ने, नवीकरण गर्ने वा १०० एमबीपीएसभन्दा मुनिको प्याकेजबाट १०० एमबीपीएस वा सोभन्दा माथिको प्याकेजमा अपग्रेड हुने ग्राहकहरूले फिफा विश्वकप २०२६ ‘टिभी प्याकेज’ बोनसको रूपमा निःशुल्क प्राप्त गर्न सक्नेछन् । उक्त बोनस प्याकेज प्राप्त गर्न ग्राहकले आफ्नो मोबाइलबाट #१४१६* र त्यसपछि ४ डायल गरी प्राप्त निर्देशन अनुसार सेटटप बक्सको एमएसी ठेगाना उपलब्ध गराउनु पर्छ ।
त्यसैगरी, एनटीटिभी ग्राहकहरूले आफ्नो टेलिभिजन सेटमार्फत हिमालय स्पोर्ट्स च्यानल छनोट गर्नासाथ स्क्रिनमा एउटा छुट्टै इन्ट्री स्क्रिन प्राप्त हुनेछ । उक्त स्क्रिनमा नेपाल टेलिकमको प्रिपेड वा पोस्टपेड मोबाइल नम्बर राख्नासाथ एउटा ओटिपी प्राप्त हुनेछ । सो ओटिपी टिभी स्क्रिनमा इन्टर गरेपछि ग्राहकको मोबाइल ब्यालेन्सबाट ९९९ रुपैयाँ कट्टा भई प्याकेज तुरुन्त सुचारु हुनेछ । साथै, नजिकको नेपाल टेलिकमको ग्राहक सेवा केन्द्रबाट पनि उक्त प्याकेज सक्रिय गर्न सकिने टेलिकमले जनाएको छ ।
प्रतिक्रिया