वीरगञ्जका मेयर सिंहसहित ७ जनाविरुद्ध मुद्दा दायर

काठमाडौं । अख्तियार दुरुपयोग अनुसन्धान आयोगले नागरिकता प्राप्तिको प्रक्रियामा झूटा विवरण प्रयोग गरिएको आरोपमा वीरगञ्ज महानगरपालिकाका मेयर राजेशमान सिंहसहित सात जनाविरुद्ध विशेष अदालतमा भ्रष्टाचार मुद्दा दायर गरेको छ।

आयोगका अनुसार अर्की महिलाकी छोरीलाई आफ्नै सन्तान भएको देखाउँदै जन्मदर्ता र नागरिकता बनाउने प्रक्रियामा संलग्न रहेको आरोप मेयर सिंहमाथि लगाइएको हो। सोही आधारमा उनलाई मुख्य अभियुक्तलाई सहयोग गरेको आरोपसहित कारबाहीको दायरामा ल्याइएको हो।

मुद्दामा नागरिकता लिने युवतीकी आमा, सम्बन्धित वडाका तत्कालीन जनप्रतिनिधि र कर्मचारी तथा जिल्ला प्रशासन कार्यालय पर्साका एक तत्कालीन अधिकृतलाई समेत प्रतिवादी बनाइएको छ। यसका अतिरिक्त गृह मन्त्रालयको छानबिन टोलीमा रहेका दुई कर्मचारीमाथि पनि तथ्य लुकाएर प्रतिवेदन तयार पारेको आरोप लगाइएको छ।

अख्तियारको दाबी अनुसार झूटा विवरणका आधारमा जन्मदर्ता तयार गरी त्यसैलाई आधार बनाएर नागरिकता जारी गरिएको थियो। अनुसन्धानका क्रममा केही सरकारी अभिलेखमा अनधिकृत हेरफेर, कागजात व्यवस्थापनमा अनियमितता तथा प्रमाण लुकाउने प्रयाससमेत भएको भेटिएको आयोगले जनाएको छ।

आयोगले सबै प्रतिवादीविरुद्ध भ्रष्टाचार निवारणसम्बन्धी कानुनअनुसार कैद र जरिवानाको माग गर्दै विशेष अदालतमा अभियोगपत्र दर्ता गरेको छ। मुद्दाको अन्तिम टुंगो भने अदालतको निर्णयपछि मात्र लाग्नेछ।