इरानले गर्‍यो अमेरिकी सैन्य क्याम्पमा क्षेप्यास्त्र आक्रमण, अमेरिकाले केश्म टापुमा आक्रमण गरेर लियो बदला

काठमाडौं । इरान र अमेरिकाबीचको तनाव फेरि बढेको छ । इरानले बुधबार कुवेत र बहराइनमा रहेका अमेरिकी सैन्य अड्डाहरूमा क्षेप्यास्त्र र ड्रोन आक्रमण गरेको हो ।

अमेरिकी केन्द्रीय कमान्डले एक विज्ञप्तिमा भनेको छ, ‘इरानले आफ्ना छिमेकी देशहरूतर्फ धेरै क्षेप्यास्त्र प्रहार गर्‍यो । यद्यपि, सबै आक्रमणहरू असफल भए । कुवेतमा प्रहार गरिएका दुई क्षेप्यास्त्रहरू या त आफ्नो लक्ष्यबाट चुके या बाटोमै नष्ट भयो । बहराइनमा प्रहार गरिएका तीन क्षेप्यास्त्रहरूलाई अमेरिकी र बहराइनको हवाई रक्षा प्रणालीले रोकेको थियो ।’

केन्द्रीय कमान्डले घटनामा कुनै पनि अमेरिकी कर्मचारीलाई क्षति नपुगेको जनाएको छ ।

‘कुनै पनि अमेरिकी कर्मचारीलाई क्षति पुगेको छैन । केन्द्रीय कमान्डका सेनाहरू सतर्क छन् र जारी युद्धविरामको समयमा अनुचित इरानी आक्रमणबाट बचाउन तयार छन्,’ विज्ञप्तिमा भनिएको छ ।

यसैबीच, बदलामा अमेरिकी सेनाले पनि इरानको केश्म टापुमा आक्रमण गरेको केन्द्रीय कमान्डले पुष्टि गरेको छ ।