३९ दिनमा सकियो ‘जलाकी’को छायांकन

काठमाडौं । अशोक थापामगरको निर्देशनमा निर्माण भइरहेको सिनेमा ‘जलाकी’को इन्डक्ल्याप गरिएको छ । गत शनिबार पोखरा इन्टरनेशनल म्युजियममा अन्तिम दृश्य खिच्दै ३९ दिनमा छायांकन सकिएको जानकारी निर्माण टिमले दिएको हो ।

शनिबार पोखरामा गीतको दृश्य खिचिएको थियो । जहाँ सिनेमाका मुख्य कलाकारहरुलाई प्रस्तुत गरिएको छ । छायांकन सकिएसँगै पोष्ट प्रोडक्सनको काम सुरु गरिएको निर्देशक अशोकले बताए । केही दिनमा सिनेमाको फर्स्टलुक पोस्टर सार्वजनिक गर्दै सिनेमाको प्रदर्शन मिति घोषणा गर्ने तयारी निर्माण टिमको छ ।

यो सिनेमाको मुख्य भूमिकामा अभिनेत्री उपासना सिंह ठकुरी छिन् । निर्देशक अशोकसँग उनले ‘खुस्मा’पछि दोस्रो पटक सहकार्य गरेकी हुन् । यो सिनेमाबाट उनले उत्कृष्ट अभिनेत्रीको राष्ट्रिय चलचित्र पुरस्कार समेत पाएकी थिइन् । जलाकीलाई लिएर पनि उपासना निकै उत्साहित देखिएकी छन् ।

त्रिकोणात्मक प्रेम कथामा आधारित सिनेमामा उपासनासहित सोनम तोप्देन, शिल्पा मास्के, माओत्से गरुङ, बुद्धिमान तामाङ, अस्तित्व भट्टचन, साहारा हाङमा लिम्बु, राजु रेग्मी मगर, उषा खड्की, खड्कबहादुर पुन (खबपु), लुनिभा तुलाधर, संगीता थापा, भावना मगर, राज काउचा गर, विषेश भूमिकामा क्याप्टेन विजय लामा र बाल कलाकारमा मुन्जन थापामगर, नुलुम्मा वान्तवा राई, रिन्ची धनहा मगरको अभिनय छ । यो सिनेमाबाट मिस सिक्किम साहारा हाङमा लिम्बुले नेपाली रजतपटमा डेब्यू गरेकी हुन् ।

‘जलाकी’ मगर समुदायको आस्थाको प्रतीकको रुपमा मानिने ढुङ्गाले चिनेको स्तम्भलाई बुझाउँछ । कसैको सम्झना र मायाको प्रतीकको रुपमा जलाकी बनाउने गरिन्छ । सोही कथामा निर्माण भएको यो सिनेमाको छायांकन पहिलो, दोस्रो र तेस्रो गर्दै तीन चरणमा गरिएको हो ।

रुकुम, रोल्पा, म्याग्दी, बाग्लुङ, पोखराका विभिन्न भू–भागमा छायांकन गरिएको सिनेमाले मगर र गुरुङ समुदायको संस्कृतिलाई झल्काउने छ । सिनेमाका निर्माताहरुमा ओम घर्ती मगर, वीरबहादुर लामा, चन्द्रबहादुर भट्टचन, बेताने मगर (बबिता राना), मानबहादुर धनाह मगर र सुस्मिता बुढाथोकी रहेका छन् ।

एम मिडिया प्रालिको ब्यानरमा निर्माण भएको सिनेमाको डिओपीमा शैलेन्द्र डी कार्की, लाइन प्रोडुसरमा राजु रेग्मी मगर र मुख्य सहायक निर्देशकमा महेश बराल तथा एसडी योगी र सरित राईको संगीत अनि सुरेन्द्र राना, हर्क साउद र राम अविरल विष्टको गीत रचना रहेको छ ।

निर्देशक अशोक थापामगरको डेब्यू निर्देशकीय सिनेमा ‘खुस्मा’ समावेश गीत ‘रुकुम मैकोट’ले युट्युबमा पाँच महिनामा दश करोड भ्युज पाउने पहिलो ऐतिहासिक रेकर्ड राख्न समेत सफल भएको थियो । खुस्मा बक्सअफिसमा हिट भएकाले निर्माण टिम जलाकीलाई लिएर पनि उत्साहित देखिएको छ ।