माछापुच्छ्रे बैंकद्वारा एमबिएल आइटी कर्जा सेवा विस्तार

काठमाडौं । डिजिटल रूपान्तरणलाई प्रवर्द्धन गर्ने उद्देश्यका साथ माछापुच्छ्रे बैंकले एमबिएल आइटी कर्जा नामक नयाँ कर्जा योजना अगाडि सारेको छ ।

सूचना प्रविधि क्षेत्रमा संलग्न व्यवसायी तथा उद्यमीहरूलाई सशक्त बनाउने लक्ष्यसहित सुरुवात गरिएको यस कर्जा योजनाले सूचना प्रविधिको क्षेत्रमा आइरहेका नवप्रवर्तनलाई प्रोत्साहन गर्नुका साथै नेपालमा विकसित हुँदै गएको सूचना प्रविधिलाई थप सुदृढ बनाउने अपेक्षा बैंकले गरेको छ । साथै, यस कर्जाले नेपालका आइटी/सफ्टवेयर कम्पनीहरूलाई चालु पुँजी, पूर्वाधार तथा सञ्चालन विस्तारका लागि सहज रूपमा वित्तीय पहुँच उपलब्ध गराउने योजना राखेको छ ।

यस योजनाअन्तर्गत कर्जा लिनका लागि सम्बन्धित सरकारी निकायमा दर्ता भएका व्यवसायहरू मात्र योग्य हुनेछन् । यसमा आइटी/सफ्टवेयर फर्म (एकल वा साझेदारी), प्राइभेट लिमिटेड कम्पनीहरु पदर्छन् र यस्ता कम्पनीहरूले प्यान, भ्याट जस्ता कर नियमित रुपमा तिरेको हुनुपर्ने बैंकले जनाएको छ ।

कम्पनीहरू सफ्टवेयर विकास, आइटी आउटसोर्सिङ, आइटी सेवा, साइबर सुरक्षा, फिनटेक, एआई, मेशिन लर्निङ जस्ता क्षेत्रमा काम गर्ने हुनुपर्नेछ र कम्तिमा दुई वर्षदेखि सञ्चालनमा रहेको हुनुपर्ने बैंकले जनाएको छ ।