इरानले २ अमेरिकी लडाकु विमान खसाल्यो, ४८ घण्टाको युद्धविरामको प्रस्ताव अस्वीकार

काठमाडौं । इरानले शुक्रबार दुई वटा अमेरिकी लडाकु विमान खसालेको दाबी गरेको छ । इरानी मिडियाका अनुसार अमेरिकी एफ१५–ई र ए–१० लडाकु विमान ध्वस्त पारिएको हो ।

एफ१५–ई लडाकु विमानमा इरानभित्र आक्रमण गरिएको थियो । विमानमा रहेका एक चालक दलका सदस्यलाई उद्धार गरिएको छ ।

यस्तै, अमेरिकी ए–१० विमान फारसी खाडीमा दुर्घटनाग्रस्त भएको छ । तर अमेरिकी अधिकारीहरूले विमान दुर्घटनाग्रस्त भएको वा गोली हानी खसालिएको बारे स्पष्ट नभएको बताएका छन् । अमेरिकी मिडियाले दुई अमेरिकी हेलिकप्टर पनि इरानी आक्रमणमा परेको जनाएको छ ।

यसैबीच, इरानले ४८ घण्टाको युद्धविरामको अमेरिकी प्रस्ताव अस्वीकार गरेको छ ।

इरानको फार्स समाचार एजेन्सीका अनुसार बुधबार तेस्रो देशमार्फत तेहरानलाई युद्धविराम प्रस्ताव पठाइएको थियो तर इरानले यसलाई स्वीकार गर्न अस्वीकार गरेको हो ।