ओलीको पक्राउप्रति निर्माण उद्योग परिषद्को कडा आपत्ति, एमालेको आन्दोलनमा सहभागी हुने घोषणा

काठमाडौं । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीलाई पक्राउ गरिएको घटनाप्रति नेपाल निर्माण उद्योग परिषद्ले कडा विरोध जनाएको छ ।

शनिबार ओलीको पक्राउलगत्तै परिषद्ले एक विज्ञप्ति जारी गर्दै यसलाई ‘राजनीतिक पूर्वाग्रह’ र ‘प्रतिशोधपूर्ण’ कदमको संज्ञा दिएको छ । परिषद्ले ओलीलाई तत्काल विनासर्त रिहा गर्न माग समेत गरेको छ ।

विज्ञप्तिमा भनिएको छ, ‘राजनीतिक पूर्वाग्रह राखी प्रतिसोधपूर्ण भावले गरिएको यो पक्राउ लोकतन्त्र, विधिको शासन र न्यायको पक्षमा उभिनेहरूमाथिको प्रहार हो । त्यसैले पूर्वप्रधानमन्त्री एवं नेकपा (एमाले)का अध्यक्ष केपी शर्मा ओलीलाई तत्काल रिहाई गरियोस् भन्ने जोडदार माग गर्दछौँ ।’

परिषद्ले यो गिरफ्तारी लोकतान्त्रिक मूल्यमान्यताको विरुद्ध रहेको उल्लेख गर्दै यसको प्रतिकार गर्ने चेतावनी दिएको छ । प्रतिशोधपूर्ण पक्राउविरुद्ध नेकपा (एमाले)ले गर्ने हरेक विरोधका कार्यक्रममा आफ्नो सक्रिय सहभागिता रहने परिषद्ले स्पष्ट पारेको छ । साथै, परिषद्ले सम्पूर्ण न्यायप्रेमी जनसमुदायलाई यस कदमको विरुद्धमा उभिन र अध्यक्ष ओलीको तत्काल रिहाईका लागि आन्दोलित हुन समेत आग्रह गरेको छ ।