काठमाडौं विश्वकै दोस्रो प्रदूषित सहर

काठमाडौं । पछिल्ला दिनमा काठमाडौं उपत्यकामा वायु प्रदूषण तीव्र रूपमा बढेको छ। मंगलबार दिउँसो १ बजेको मापन अनुसार काठमाडौं विश्वकै सबैभन्दा प्रदूषित सहरहरूको सूचीमा दोस्रो स्थानमा पुगेको हो ।

एयर क्वालिटी इन्डेक्स अनुसार काठमाडौंको प्रदूषण स्तर १९५ पुगेको छ, जुन स्वास्थ्यका लागि ‘अति अस्वस्थकर’ मानिन्छ। उपत्यकाभित्र सबैभन्दा बढी प्रदूषण लाजिम्पाट क्षेत्रमा देखिएको छ, जहाँ एक्यूआई २२६ पुगेको छ। यस्तै रानीबारीमा १९६ र क्षेत्रपाटीमा १८८ मापन गरिएको छ।

उपत्यका बाहिर कर्णाली प्रदेशको वीरेन्द्रनगरमा एक्यूआई २३२ र सुदूरपश्चिमको धनगढीमा २०९ पुगेको छ। अन्तर्राष्ट्रिय संस्था आईक्यू एयरका अनुसार भारतको दिल्लीमा एक्यूआई २४७ रहेको छ।

विज्ञहरूका अनुसार हावा नचल्नु, उद्योग, सवारीसाधन, इँटाभट्टा तथा छिमेकी देशबाट आउने धुवाँका कारण प्रदूषण बढेको हो। वर्षा र हावाको बहाव बढेपछि आगामी दिनमा वायुको गुणस्तरमा सुधार हुन सक्ने अनुमान गरिएको छ।