काठमाडौं । एनआईसी एशिया बैंक लिमिटेड र इन्द्रप्रस्थ मेडिकल कर्पोरेसन लिमिटेड (अपोलो हस्पिटल) नयाँ दिल्ली, भारतबीच बैंकका ग्राहकहरूलाई स्वास्थ्य उपचारमा विशेष छुट उपलब्ध गराउने सम्बन्धमा समझदारी पत्रमा हस्ताक्षर भएको छ ।
समझदारी पत्रमा बैंकको तर्फबाट सहायक प्रमुख कार्यकारी अधिकृत राजेश रावल र इन्द्रप्रस्थ मेडिकल कर्पोरेसनका तर्फबाट प्रबन्धक विपिन शर्माले हस्ताक्षर गरे ।
यसमा एनआईसी एशिया बैंकका ग्राहकहरुले बिरामी भित्र कोठा शुल्क, निवारक स्वास्थ्य जाँच प्याकेजहरू र सहभागीहरूको स्वास्थ्य जाँच सेवाहरुमा १० प्रतिशत छुट सुविधा उपयोग गर्न सक्नेछन् र बाहिरी रोगी अनुसन्धानमा ५ प्रतिशत छुट सुविधा उपलब्ध रहेको छ । साथै, निस्शुल्क दर्ता शुल्क, अन्तर्राष्ट्रिय बिरामी लाउन्जमा पहुँचजस्ता सुविधाहरु समेत उपलब्ध हुनेछन् ।
यसैगरी, काठमाडौंस्थित अपोलो इन्फर्मेसन सेन्टरमार्फत अपोइन्टमेन्ट लिने बैंकका ग्राहकहरुलाई नयाँ दिल्लीको एयरपोर्टबाट होटल/हस्पिटलसम्मको लागि यातायातको थप सुविधा समेत उपलब्ध हुनेछ । उक्त सुविधाको उपयोग गर्न ग्राहकहरुले बैंकको डेबिट कार्ड वा क्रेडिट कार्ड प्रयोग गरी भुक्तानी गर्नुपर्ने छ ।
हस्पिटलसँगको यस सहकार्यले एनआईसी एशिया बैंकका ग्राहकहरुलाई स्वास्थ्य उपचारमा सहुलियत हुने बैंकले विश्वास लिएको छ ।
प्रतिक्रिया