एमालेको झण्डा जलाएको आरोपमा एक जना पक्राउ

दाङ । नेकपा एमालेको चुनाव चिन्ह अंकित झण्डा जलाएको आरोपमा एक जनालाई प्रहरीले पक्राउ गरेको छ । जिल्ला प्रहरी कार्यालय दाङले तुलसीपुर उपमहानगरपालिका–७ कालाखोला निवासी ५५ वर्षीय बुद्धिबहादुर बस्नेतलाई पक्राउ गरेको हो ।

बिहीबार तुलसीपुर उपमहानगरपालिका–५, वीरेन्द्र चोकमा राष्ट्रिय स्वतन्त्र पार्टीका सभापति रवि लामिछानेको स्वागतमा भेला भएका व्यक्तिहरुले नेकपा एमालेको चुनाव चिह्न अंकित झण्डा जलाएको अभियोगमा उनी पक्राउ परेका हुन् ।

शान्ति सुरक्षा र सामाजिक सद्भावमा खलल पुग्ने यस्ता गतिविधि नगर्न र सम्पूर्ण सरोकारवाला पक्षलाई संयमित एवं जिम्मेवार भईदिन पनि जिल्ला प्रहरी कार्यालयले अनुरोध गरेको छ ।