‘धुरन्धर’ले पार गर्‍यो हजार करोड क्लबको आँकडा

काठमाडौं । ‘धुरन्धर’ले २१ दिनमा बक्सअफिसमा कुल एक हजार करोड भारतीय रुपैयाँ कलेक्सन गरेको छ । रणवीर सिंह मुख्य भूमिकामा रहेको चलचित्रले विश्वभरबाट एक हजार करोड रुपैयाँको आँकडा पहिलो २१ दिनमा पार गरेको हो ।

‘धुरन्धर’ले भारतमा मात्रै ६५० करोड रुपैयाँभन्दा बढी कमाई गरेको छ । डिसेम्बर ५ मा रिलिज भएदेखि नै ‘धुरन्धर’ सिनेमाघरहरूमा आक्रामक व्यापार गरिरहेको छ ।

‘धुरन्धर’ सन् २०२५ को सबैभन्दा धेरै कमाउने भारतीय सिनेमा बनिसकेको छ । यो सिनेमा अब विश्वव्यापी बक्सअफिसमा प्रतिष्ठित एक हजार करोड क्लबमा प्रवेश गरेको छ ।

‘धुरन्धर’ले यस वर्षका अघिल्ला ब्लकबस्टर सिनेमा ‘कान्तारा च्याप्टर–१’ र ‘छावा’लाई उछिन्दै धेरै रेकर्डहरू बनाएको छ । ‘छावा’ले विश्वभरबाट ८०७.९१ करोड भारतीय रुपैयाँ र ‘कान्तारा च्याप्टर–१’ ले विश्वव्यापी रूपमा ८५२ करोड रुपैयाँ कमाएको छ ।

जियो स्टुडियोका अनुसार ‘धुरन्धर’ले २१ दिनमा विश्वव्यापी रूपमा कुल एक हजार ६.७ करोड रुपैयाँ कलेक्सन गरेको छ । घरेलु बक्सअफिसमा ‘धुरन्धर’ले पहिलो २१ दिनमा भारतमा ६६८.८० करोड र ओभरसिज मार्केटमा २१७.५० करोड रुपैयाँ कलेक्सन गरेको छ ।

पहिलो हप्तामा धुरन्धरले २१८ करोड रुपैयाँ कमाई गरेको थियो । दोस्रो हप्तामा २६१.५० करोड, १५ दिन र २० दिनको बीचमा सिनेमाले आफ्नो संख्यामा थप १६०.७० करोड रुपैयाँ थपेको छ । क्रिसमसको दिन (२१ औँ दिन)मा ‘धुरन्धर’ले २८.६० करोड रुपैयाँ कलेक्सन गरेको छ ।

घरेलु नेट कलेक्सनको आधारमा यो ब्लकबस्टर सिनेमा शीर्ष दस सर्वाधिक कमाई गर्ने भारतीय फिल्महरूको सूचीमा पनि प्रवेश गरेको छ । यसले रणवीर कपूरको एनिमललाई उछिनेर नवौं स्थानमा पुगेको छ ।

रणवीर सिंहको मुख्य भूमिकामा रहेको धुरन्धरमा अक्षय खन्ना, अर्जुन रामपाल, संजय दत्त, आर. माधवन, सारा अर्जुन र राकेश बेदीजस्ता कलाकारहरूको समूह छ । यो सिनेमालाई आदित्य धरले निर्देशन गरेका छन् ।

निर्माताहरूले पहिले नै सिक्वेलको घोषणा गरिसकेका छन्, जुन १९ मार्च २०२६ मा रिलिज हुनेछ । यो सिनेमाको पोस्ट–क्रेडिट दृश्यमा सिक्वेल रिलिजको मिति उल्लेख गरिएको छ । सिक्वेल हिन्दी, तमिल, तेलुगु, कन्नड र मलयालममा रिलिज हुनेछ ।