काठमाडौं, ५ मंसिर । नेकपा (एमाले)का महासचिव शंकर पोखरेलले देशलाई ‘सही दिशामा फर्काउन’ सबै नागरिक एकजुट हुनुपर्ने बताएका छन् ।
बिहीबार बिहान सामाजिक सञ्जाल फेसबुकमा स्टाटस लेख्दै उनले शान्ति, सुरक्षा र लोकतन्त्र जोगाउन राष्ट्रिय एकता आवश्यक रहेको जोड दिएका हुन् ।
पोखरेलले आज ‘राष्ट्रिय स्वयम्सेवक फोर्स’ गठन हुने उल्लेख गर्दै त्यसको भोलिपल्ट अर्थात् मंसिर ६ गते भोलि काठमाडौंमा ‘व्यापक जनप्रदर्शन’ रहेको जानकारी गराए । उनका अनुसार यस्तो प्रदर्शन नागरिकको ‘कर्तव्य र अधिकार’ दुवै हो ।
महासचिव पोखरेलले लेखेका छन्, ‘अब समय आएको छ– देशलाई सही दिशामा फर्काउने, मंसिर ५ गते राष्ट्रिय स्वयम्सेवक फोर्सको गठन र मंसिर ६ गते काठमाडौंमा व्यापक जनप्रदर्शन– हाम्रो कर्तव्य, हाम्रो अधिकार, शान्ति, सुरक्षा र लोकतन्त्रका लागि एकताबद्ध बनौँ ।’
हालैको राजनीतिक बहस, न्यायिक विवाद र सरकारप्रति बढ्दै गएको असन्तुष्टिलाई मध्यनजर गर्दै एमालेले सडक आन्दोलन तथा संगठन विस्तारमा सक्रियता बढाएको छ । पोखरेलको यस अभिव्यक्तिलाई पार्टीको आगामी रणनीति र काठमाडौंमा हुने प्रदर्शनको संकेतका रूपमा हेरिएको छ ।
एमालेले हालका घटनाले ‘राज्य सञ्चालन कमजोर’ बनेको बताउँदै नागरिक सहभागितामार्फत ‘राजनीतिक हस्तक्षेपहरू’ रोक्नुपर्ने बताउँदै आएको छ ।
प्रतिक्रिया