काठमाडौं, ४ मंसिर । पाकिस्तानी वायुक्षेत्रमा भारतीय विमान उड्न रोक लगाएपछि भारतीय विमानहरू त्यसको प्रयोग गर्न असमर्थ छन् । यसले भारतीय विमान कम्पनीहरू ठूलो आर्थिक क्षति भोग्न र लामो मार्ग अपनाउन बाध्य भएका छन् ।
यसैबीच, विमान उडान लागत र वित्तीय बोझले संकटमा परेको एयर इन्डियाले भारत सरकारसँग कूटनीतिकस्तरमा चीनसँग कुरा गरी एयरलाइनलाई शिनजियांगको संवेदनशील होटन मार्ग प्रयोग गर्ने अनुमति दिलाउन अनुरोध गरेको छ ।
यो मार्ग प्राप्त भएको खण्डमा अमेरिका, क्यानडा र युरोपतर्कका उडानहरूको समय र इन्धन लागत घट्नसक्ने समाचार एजेन्सी रोयटर्सले उल्लेख गरेको छ ।
यही वर्ष अप्रिलमा भारत–पाकिस्तानबीच सैन्य तनाव बढेपछि भारतीय विमान सेवालाई पाकिस्तानी वायुक्षेत्रभरी उडान भर्ने अनुमति छैन ।
यसले एयर इन्डियाका लामो दूरीका उडानहरूको अवधि तीन घण्टासम्म बढेको र इन्धन खर्च २९ प्रतिशतले वृद्धि भएको छ ।
यो प्रतिबन्धले वार्षिक ४५५ मिलियन डलरको आयमा कमी हुने कम्पनीले अनुमान गरेको छ ।
एयर इन्डियाले अनुरोध गरेको मार्ग चीनको पश्चिमी थिएटर कमान्डअन्तर्गत पर्दछ, जहाँ पिपल्स लिबरेसन आर्मीका क्षेप्यास्त्र र वायु रक्षा प्रणालीहरू तैनाथ रहेको बताइएको छ ।
यो क्षेत्र अग्ला पहाडहरूले घेरिएको छ । सुरक्षा जोखिमको कारण अन्तर्राष्ट्रिय विमान सेवाहरूले सामान्यतया यसबाट टाढा रहने प्रयास गर्दछन् । विज्ञहरू चीनले यो मार्ग खोल्ने सम्भावना अत्यन्त कम रहेको बताउँछन् ।
गत जुनमा गुजरातको अहमदाबादबाट लन्डन जाँदै गरेको बोइङ ७८७ ड्रिमलाइनर दुर्घटनामा २६० जनाको मृत्यु र त्यसपछि सुरक्षा जाँचबाट उडानहरू घटाउने निर्णयले एयरलाइनको प्रतिष्ठा र नेटवर्कलाई ठूलो असर गरेको छ ।
प्रतिक्रिया