काठमाडौं, २८ कार्तिक । नेपालका लागि केन्याका अवैतनिक वाणिज्यदूत चन्द्र टण्डन नेतृत्वको प्रतिनिधिमण्डललाई केन्या संसदले विशेष स्वागत र सम्मान गरेको छ।
संसदका सभापतिले टण्डन टोलीलाई सम्मानपूर्वक अभिवादन गर्दै नेपाल–केन्या द्विपक्षीय सम्बन्धलाई अझ सुदृढ बनाउन टण्डनले पु¥याउँदै आएको भूमिकाको प्रशंसा गरे । सम्मानले २०२५ जुन महिनामा केन्याका उच्चायुक्तको उपस्थितिमा औपचारिक रूपमा उद्घाटन गरिएको नेपाल–केन्या कन्सुलेट कार्यालयको प्रतिष्ठा थप उच्च बनाएको बताइएको छ।
संसदबाट प्राप्त यस्तो सार्वजनिक मान्यतालाई नैरोबीले नेपाल–केन्या हितका लागि कन्सुलको भूमिकालाई अझ सक्रिय रूपमा उपयोग गर्न इच्छुक रहेको बलियो संकेतका रूपमा लिइएको छ।
नेपालको व्यापार क्षेत्रसँग लामो समयदेखि संलग्न टण्डनले केन्याका उत्पादनहरूको लागि नयाँ बजार मार्ग खोल्न महत्वपूर्ण पहल गर्दै आएका छन्, जसले पूर्वी अफ्रिकी सामान र नेपाली बजारबीच नयाँ व्यापारिक पुल निर्माण गरेको छ।
यसका अतिरिक्त, नेपालमा रहेका साना तर बढ्दो केन्याली समुदायका लागि प्रभावकारी कन्सुलर सेवा प्रदान गर्दै टण्डनले जनस्तरको सम्बन्ध मजबूत बनाउँदै आएका छन्।
नैरोबी र काठमाडौंबीच पछिल्ला वर्षहरूमा कूटनीतिक सक्रियता उल्लेखनीय रूपमा बढिरहेको अवस्थामा केन्या संसदको यो औपचारिक प्रशंसाले द्विपक्षीय सहकार्यलाई नयाँ उचाइमा पुर्याएको छ। वाणिज्यदूत टण्डनको योगदानले नेपाल–केन्या सम्बन्धलाई पारस्परिक विकास र आर्थिक साझेदारीको नयाँ ढाँचामा विस्तार गर्न महत्वपूर्ण भूमिका खेलेको बताइएको छ।
प्रतिक्रिया