बंगलादेशले भारतीय कूटनीतिज्ञलाई बोलायो, शेख हसिनाको अन्तर्वार्ताप्रति कडा आपत्ति

काठमाडौं, २७ कात्तिक । बंगलादेशको विदेश मन्त्रालयले बुधबार भारतीय उपउच्चायुक्त पवन बादेहलाई बोलाएर भारतका मिडियामा पूर्वप्रधानमन्त्री शेख हसिनाको अन्तर्वार्ताप्रति गम्भीर चिन्ता व्यक्त गरेको छ । यो मामिलाले दुई देशबीचको कूटनीतिक तनाव बढाउन सक्ने जनाइएको छ ।

विदेश मन्त्रालयले भारतीय अधिकारीसँग एक ‘भागेकी नेता’लाई मिडियामा स्थान दिइएको भन्दै आपत्ति प्रकट गरेको छ । यस्तो कार्य अस्वीकार्य भएको बंगलादेशले जनाएको छ ।

सरकारी समाचार एजेन्सी बीएसएसले जनाएअनुसार, हसिनाले हालैका दिनमा धेरै प्रमुख भारतीय र अन्तर्राष्ट्रिय मिडियालाई अन्तर्वार्ता दिएकी छन् ।

७८ वर्षीया हसिना सन् २०२४ अगस्टमा विद्यार्थी आन्दोलन र हिंस्रक प्रदर्शनको बलमा सत्ताबाट हटाइएकी थिइन् । उनीविरुद्ध मानवताविरुद्धको अपराध र भ्रष्टाचारका धेरै मुद्दा दर्ता छन् ।

उनी २०२४ अगस्ट ५ मा बंगलादेशबाट भागेर भारतमा बसिरहेकी छन् । हसिनाका समर्थक उनीमाथिका आरोप राजनीतिक प्रतिशोधको हिस्सा भएको बताउँछन् ।

बंगलादेशका अनुसार, भारतले त्यहाँको मिडिया स्वतन्त्र रहेको र सरकारले त्यसको कामकाजमा हस्तक्षेप नगर्ने स्पष्ट पारेको छ । भारतीय अधिकारीले प्रेस स्वतन्त्रता भारतको लोकतान्त्रिक परम्पराको हिस्सा भएको र सरकारले कुनै पनि अन्तर्वार्तामा प्रतिबन्ध लगाउन नसक्ने बताएका छन् ।

बंगलादेशको विदेश मन्त्रालयले मुद्दाको सामना गरिरहेकी र देशबाट भागेकी नेतालाई मिडियामा स्थान दिइनु दुई देशबीचको रचनात्मक सम्बन्धका निम्ति हानिकारक भएको जनाएको छ ।