एसमा रहेका नेताकार्यकर्तालाई मुख्यमन्त्री कार्कीको आह्वान– फेरि आफ्नै घर एमालेमा फर्कनुस्

विराटनगर, १५ कात्तिक । नेकपा (एमाले)का स्थायी कमिटी सदस्य तथा कोशी प्रदेशका मुख्यमन्त्री हिक्मतकुमार कार्कीले नेकपा (एकीकृत समाजवादी) पार्टीभित्र भइरहेको हालको बहस र निर्णयहरू ‘केवल एमालेलाई कमजोर पार्ने राजनीतिक प्रयत्न’ भएको टिप्पणी गरेका छन् । उनले एकीकृत समाजवादी पार्टीको हालको दिशा र उद्देश्य मूलतः ‘आक्रोश र अवसरवाद’मा आधारित भएको बताउँदै समाजवादीमा रहेका सबै नेता कार्यकर्तालाई पुनः एमालेमा फर्किन आग्रह गरे ।

मुख्यमन्त्री कार्कीले सामाजिक सञ्जालमार्फत सार्वजनिक गरेको वक्तव्यमा भनेका छन्, ‘नेकपा (एमाले) विभाजनको पुष्टि न २०५४ सालले गर्न सक्यो, न २०७८ सालको विभाजनले, यी दुवै विभाजन केवल केही नेताहरूको पद, प्रतिष्ठा र अवसरका निम्ति प्रयोग मात्र भए ।’  उनका अनुसार, यी घटनाहरूले विचार र सिद्धान्त होइन, व्यक्तिगत स्वार्थकै कारण वाम आन्दोलन कमजोर हुने अवस्था सिर्जना गरे ।

मुख्यमन्त्री कार्कीले हाल एकीकृत समाजवादी पार्टीभित्र चलिरहेको विवाद र निर्णय प्रक्रियालाई पनि सोही मानसिकताको निरन्तरता भन्दै ती बहसहरूले वाम आन्दोलनलाई न त सुदृढ बनाउने, न त वैचारिक स्पष्टता दिने, बरु एमालेलाई कमजोर पार्ने मात्रै उद्देश्य राखेको बताए । उनले लेखेका छन्, ‘अहिले नेकपा (समाजवादी) पार्टीमा जे बहस र निर्णय हुँदै छ, त्यसबाट विभाजनको उद्देश्य केवल नेकपा (एमाले)लाई कमजोर पार्ने र आफू मूल नेतृत्वमा नभएको पीडा र आक्रोश व्यक्त गर्ने मात्रै देखिन्छ, त्यसभन्दा बढी त नेकपा (समाजवादी)लाई माओवादीमा सम्मिलित गराउनु अघिको आश्रय स्थल मात्र हो भन्ने पुष्टि भएको छ ।’

मुख्यमन्त्री कार्कीले एकीकृत समाजवादी पार्टीमा रहेका नेताहरूलाई ‘अस्थायी बाटो छोडेर स्थायी घर फर्कन’ आग्रह गरेका छन् । उनले लेखेका छन्, ‘त्यस पार्टीमा रहनुभएका आदरणीय सम्पूर्ण नेता तथा कार्यकर्ता साथीहरू आउनुहोस्, हामी फेरि एक पटक आफ्नो घर, अर्थात् नेकपा (एमाले)मै समाहित होऊँ, हामीले दुःख, कष्ट र समर्पणका साथ बनाएको आफ्नो प्यारो पार्टीलाई अझ सशक्त बनाऔँ ।’

कार्कीले हाल एमाले देशको जटिल राजनीतिक परिस्थितिको सटिक विश्लेषण गर्दै नीति, विधि र नेतृत्व संरचनालाई नयाँ ढङ्गले परिमार्जन गर्न लागिपरेको उल्लेख गरेका छन् । उनका अनुसार, आगामी ११ औं राष्ट्रिय महाधिवेशन पार्टीको वैचारिक, संगठनात्मक र नीतिगत रूपान्तरणको ऐतिहासिक अवसर बन्नेछ ।

‘नेकपा (एमाले) अहिले आफ्नो ११ औं राष्ट्रिय महाधिवेशनको तयारीमा छ,’ उनले लेखेका छन्, ‘यो अवसरलाई सदुपयोग गर्दै महाधिवेशनलाई उत्सवमा परिणत गरौँ र नेकपा (एमाले)लाई नेपालकै निर्णायक राष्ट्रिय शक्तिको रूपमा रूपान्तरण गरौँ ।’

मुख्यमन्त्री कार्कीको भनाइमा पार्टीभित्रको आत्मसमीक्षा, वैचारिक स्थिरता र राष्ट्रिय जिम्मेवारी नै एमालेको भावी यात्राको मूल ध्येय हो ।