शाओमीको लाइका क्यामरासहितको नयाँ स्मार्टफोन ‘शाओमी १५टी’ बजारमा

काठमाडौं, २८ असोज । विश्वव्यापी प्रविधि अग्रणी कम्पनी शाओमीले आफ्नो नवीनतम स्मार्टफोन शाओमी १५टी नेपालमा औपचारिक रूपमा सार्वजनिक गरेको छ ।

कम्पनीका अनुसार यो फ्ल्यागशिप स्मार्टफोनमा लाइकासँग मिलेर विकसित गरिएको ट्रिपल क्यामरा प्रणाली राखिएको छ, जसले व्यावसायिक स्तरको फोटोग्राफी र उच्चस्तरीय प्रदर्शन दुवै प्रदान गर्छ ।

शाओमी नेपालका कन्ट्री जनरल म्यानेजर मनु मनस्वीले भने, “शाओमी १५टी शक्ति, बुद्धिमत्ता र नवप्रवर्तनको संयोजन हो । लाइकासँगको सहकार्यले हामीले प्रयोगकर्तालाई उत्कृष्ट तस्वीर गुणस्तर भएको क्यामरा प्रणाली उपलब्ध गराएका छौँ । एआई प्रविधि र उच्च प्रदर्शन क्षमताको साथ यो स्मार्टफोनले नेपाली उपभोक्ताका लागि मोबाइल फोटोग्राफी र प्रयोग अनुभवमा नयाँ स्तर ल्याउनेछ ।”

शाओमी १५टीमा तीनवटा लाइका क्यामरा छन्— ५०एमपी मुख्य क्यामरा (२३एमएम), ५०एमपी टेलिफोटो क्यामरा २एक्स अप्टिकल जुमसहित (४६एमएम), र १२एमपी अल्ट्रा वाइड क्यामरा (१५एमएम) । ठूलो अपर्चर भएको लाइका समिलक्स लेन्सले अँध्यारोमा पनि स्पष्ट र रंगिन तस्वीर खिच्न सक्छ ।

फोनको डिजाइन पातलो र आकर्षक छ । यसमा मुलायम किनार, म्याट फिनिश, र केवल ७.५ मिमि पातलो र १९४ ग्राम तौल छ, जसले लामो समय प्रयोग गर्दा पनि सजिलो अनुभव दिन्छ ।

कम्पनीका अनुसार यो फोन आईपी६८ प्रमाणित भएकाले पानी र धुलोबाट सुरक्षित रहन्छ, र कोर्निङ गोरिल्ला ग्लास ७आईले स्क्र्याचबाट सुरक्षा दिन्छ । फोनमा मेडियाटेक डाइमेन्सिटी ८४०० अल्ट्रा चिपसेट (४ न्यानोमिटर), १२जीबी एलपीडीडीआर५एक्स र्‍याम, र ५१२ जीबी यूएफएस ४.१ स्टोरेज दिइएको छ ।

यो एन्ड्रोइड १५मा आधारित हाइपरओएस २मा चल्छ (हाइपरओएस ३ पनि चाँडै उपलब्ध हुनेछ) । साथै, यसमा ६.८३ इन्चको एएमोलेड डिस्प्ले, १.५के रिजोल्युसन र १२० हर्ज रिफ्रेस रेट रहेको छ । फ्रन्टतर्फको ३२एमपी क्यामराले उच्च गुणस्तरका सेल्फी र भिडियो कलका लागि सहयोग गर्छ ।

शाओमी १५टीमा ५५०० एमएएच ब्याट्री र ६७ वाट हाइपरचार्ज फास्ट चार्जिङ सुविधा छ (चार्जरसहित) यसमा डुअल सिम, वाइफाइ ६ई, ब्लुटुथ ६.०, मल्टीफङ्शनल एनएफसी, ५जी समर्थन, र जीपीएस, ग्लोनास, ग्यालिलियो, बेइडो, क्युझेडएसएस र नाभिक जस्ता मल्टिब्यान्ड पोजिसनिङ प्रणाली पनि छ ।

नेपालमा शाओमी १५टी (१२जीबी/५१२जीबी) मोडेलको मूल्य ६४,९९९ रुपैयाँ तोकिएको छ । यो स्मार्टफोन ब्ल्याक, ग्रे र रोज गोल्ड गरी तीन रंगमा देशभरका शाओमीका अधिकृत स्टोरहरूमा उपलब्ध रहेको कम्पनीले बताएको छ ।