पहिलो कुमन कप : नेपाली विद्यार्थी र जापानी विद्यार्थीबीच मैत्रीपूर्ण फुटसल

काठमाडौं, २२ साउन । पहिलो कुमन कप २०२५ अन्तर्गत नेपाली विद्यार्थी र जापानी विद्यार्थीबीचको मैत्रीपूर्ण फुटसल खेल सम्पन्न भएको छ ।

बिहीबार कलंकीस्थित एलआरआई फुटसल ग्राउन्डमा सम्पन्न मैत्रीपूर्ण खेलमा जापानी विद्यार्थीले उपाधि जितेका थिए ।

नेपाली विद्यार्थी र जापानी विद्यार्थीबीचको मैत्रीपूर्ण फुटसल प्रतियोगिताले टीमवर्क, अनुशासन, र सांस्कृतिक आदानप्रदानको सन्देश दिएको आयोजक कुमन नेपालले जनाएको छ ।

कुमन नेपालले आईजीसी बिजनेस होल्डिङ र कलरबाथको सहकार्यमा प्रतियोगिताको आयोजना गरेको हो ।

मैत्रीपूर्ण खेलमा एलआरआई स्कूल, युनाइटेड स्कूल, भ्याली पब्लिक स्कूल, र लॉयल्टी एकेडेमीका विद्यार्थीहरू सहभागी भएका थिए । जापानबाट आएका विद्यार्थीहरूसँगको खेलले विद्यार्थीहरूबीच अन्तर्राष्ट्रिय मित्रता विकास गर्ने र सिकाइको फराकिलो परिभाषा दिने उद्देश्य बोकेको थियो ।

कार्यक्रम एलआरआई स्कुल र जापानी प्रतिनिधि योशिकावा युसुकेको स्वागत मन्तव्यबाट सुरु भयो । त्यसपछि नेपाल र जापानका राष्ट्रगान बजाइयो । छोटो सांस्कृतिक आदानप्रदान सत्रले कार्यक्रममा थप ऊर्जा र आत्मीयता थपेको थियो ।

मैदानमा सबै टिमहरूले उत्कृष्ट खेल कौशल प्रदर्शन गरे । अन्ततः जापानी विद्यार्थीहरूले विजयी भएर प्रतियोगिताको उपाधि जिते ।

कुमन शिक्षा प्रणाली नेपालमा २०२३ देखि औपचारिक रूपमा लागू भएको हो, र यसले आत्मअध्ययन, आलोचनात्मक सोच, र व्यक्तिगत विकासमा जोड दिन्छ । आजको खेलले कुमनको यही दृष्टिकोणलाई व्यवहारमा उतारेको थियो, जहाँ शिक्षा भनेको केवल किताबी ज्ञान होइन, जीवन सीप, सहकार्य, र मित्रता पनि हो । पहिलो कुमन कप २०२५ ले शिक्षा र खेलकुदको संयोजनमार्फत बालबालिकाको समग्र विकासमा सन्देश दिएको आयोजकको भनाइ छ ।