पाथीभरामा कानून अनुसार केबलकार बनाउन दिइएको कुरा बिर्सन हुँदैन : योगेश भट्टराई

काठमाडौं, ११ फागुन । नेकपा (एमाले) का सचिव एवं प्रतिनिधिसभा सांसद योगेश भट्टराईले ताप्लेजुङको पाथीभरामा कानून अनुसार नै केबलकार बनाउन दिइएको कुरा बिर्सन नहुने बताएका छन् ।

आजको प्रतिनिधिसभाको बैठकमा बोल्दै सांसद भट्टराईले नेपालको ऐन कानूनको व्यवस्थाअनुसार नै निजी क्षेत्रलाई अनुमति दिइएको र त्यस आधारमा नै काम अगाडि बढाएको बताएका हुन् ।

विरोधको पनि सीमा हुने उल्लेख गर्दै उनले सभ्य र शान्तिपूर्ण ढंगले विरोध गर्नुपर्ने धारणा राखे ।

“नेपालको ऐन–कानुनको व्यवस्थाअनुसार नै केबलकार निर्माणको जिम्मा कुनै निजी क्षेत्रलाई दिएको बिर्सन हुँदैन । त्यसकै आधारमा निर्माण कार्य अघि बढाएको हो,” उनले भने, “विरोधका सीमा हुन्छन् । सभ्य र शान्तिपूर्ण ढंगले अघि बढाउनुपर्छ ।”