टाटाको नेक्सन केथ्री इभी नेपाली बजारमा, कति पर्छ मूल्य ?

काठमाठौं, २१ माघ । भारतको अग्रणी विद्युतीय गाडी निर्माता टाटा मोटर्सले आफ्नो चर्चित नेक्सन ब्राण्डको नयाँ संस्करण ‘नेक्सन केथ्री इभी’को नेपाली बजारमा बुकिङ खुला गरेको छ । टाटाको नेपालस्थित आधिकारिक बिक्रेता सिप्रदी ट्रेडिङले आइतबार गैरीधारामा आयोजित एक समारोहकाबीच ४५ किलोवाट ब्याट्री क्षमताको नयाँ नेक्सनको डिजाइन सार्वजनिक गरेसँगै बिक्रीका लागि बुकिङ खुला गरेको हो ।

कम्पनीका अनुसार नयाँ ४५ किलोवाट ब्याट्री क्षमता भएको यस सीयुभी (क्रसओभर युटिलिटी भेहिकल) नवीन प्रविधि, आकर्षक डिजाइन, उच्च कार्यकौशलता एवं अत्याधुनिक आरामदायी सुविधाहरुले सम्पन्न रहेको छ । नेक्सन केथ्री इभीको सुरुवाती मूल्य ४८.९९ लाख रुपैयाँ रहेको छ । साथै, सुरुवाती अफरमा ग्राहकहरुलाई ७.२ किलोवाटको एसी फास्ट चार्जर गाडीसँगै निःशुल्क उपलब्ध गराइनेछ ।

कार्यक्रममा सिप्रदी ट्रेडिङका प्रमुख कार्यकारी अधिकृत राजन बाबु श्रेष्ठले भने, ‘सिप्रदी ट्रेडिङ प्रालि र टाटा मोटर्स बीचको सहकार्यमा पहिलो पटक विद्युतीय गाडी नेक्सन इभी प्राइम २०२१ मा नेपालमा बिक्री/वितरण सुरु गरिएको थियो । यसलाई नेपाली ग्राहकहरुले अत्याधिक रुपमा मनपराई दिनुभयो । ग्राहकहरुको त्यहीँ विश्वासलाई आत्मसाथ गर्दै हामीले नेपालको इभी इको सिस्टममा लगानी गर्‍यौँ । अहिले हामी गर्वका साथ भन्न सक्छौँ कि सिप्रदीले नेपालको सबैभन्दा ठूलो इभी इको सिस्टम, जसमा १८५ भन्दा बढी चार्जिङ स्टेशन, १६ भन्दा बढी सर्भिस सेन्टरबाट सेवा प्रदान गर्दै आइरहेको छ । र आजबाट बुकिङ सुरु भएको नेक्सन केथ्री इभीको बिक्रीसँगै, बिक्रीपश्चात्को सेवालाई पनि उत्तिकै ध्यान राख्ने छौँ ।’

टाटा प्यासेन्जरअन्तर्गतको इलेक्ट्रीक मोबिलिटी लिमिटेडका अन्तर्राष्ट्रिय व्यापार प्रमुख यश खंडेलवालले भने, ‘नेपालभर ३,००० भन्दा बढी सन्तुष्ट ग्राहकहरूको साथसहित नेक्सन केथ्री इभीले नेपाली बजारमा आफ्नो विशिष्ट छवि बनाइसकेको छ । हामीले नेपाली ग्राहकहरूको यो माया एवं विश्वासको कदर स्वरुप आज नेक्सन केथ्री इभीको बुकिङ सुरु गरेका छौँ, र प्रविधि, डिजाइन, आराम एवं सुरक्षाको नयाँ मानक स्थापित गरेको यस गाडीले ग्राहकहरुको यात्रा अनुभवलाई नयाँ उचाईमा पुर्‍याउने विश्वास समेत लिएका छौँ ।’