जुम्लाको पातारासीमा नेपाल टेलिकमको मोबाइल सेवा विस्तार

काठमाडौं, १७ मंसिर । नेपाल टेलिकमले कर्णाली प्रदेशअन्तर्गत जुम्ला जिल्लाको पातारासी गाउँपालिकामा मोबाइल सेवा विस्तार गरेको छ ।

पातारासी गाउँपालिका वडा नं. २ मा नयाँ साइट निर्माण गरी आइतबारदेखि २जी/४जी मोबाइल सेवा सञ्चालन गरिएको टेलिकमका प्रवक्ता हरि ढकालले जानकारी दिए ।

उनका अनुसार जिल्लाको अति विकट पातारासी गाउँपालिकामा नेपाल टेलिकमले मोबाइल सेवा सञ्चालन गरेसँगै गाउँपालिकाका वडा नं. १, २ र ३ अन्तर्गतका  गडीगाउँ, तल्फीगाउँ, माताचौरगाउँ, छुमचौरगाउँलगायत स्थानमा बसोबास गर्ने बासिन्दाहरु पहिलो पटक दूरसञ्चार सेवाबाट लाभान्वित भएका छन् ।

दूर दराजका क्षेत्रमा दूरसञ्चार सेवा पुर्‍याउने कार्यलाई उच्च प्राथमिकतामा राख्दै कम्पनीले ती स्थानका ग्राहकहरुको मागलाई लक्षित गरी भ्वाइस तथा डाटा सेवाको विस्तार गरेको छ । यससँगै यस भेगका स्थानीयवासी, घुम्न आउने पर्यटकहरु तथा यस क्षेत्रका पर्यटनलगायत अन्य व्यवसायीहरुले आधुनिक दूरसञ्चार सेवाको प्रयोग गरी लाभ लिन सक्ने विश्वास कम्पनीको रहेको छ ।