उरुग्वेका फुटबलर स्वरेजको अन्तर्राष्ट्रिय फुटबलबाट सन्यास

काठमाडौं, १८ भदौ । उरुग्वेका सुपरस्टार फुटबलर लुइस स्वरेजले अन्तर्राष्ट्रिय फुटबलबाट सन्यास लिएका छन् । ३७ वर्षीय स्वरेजले उरुग्वेको राष्ट्रिय टिमबाट नखेल्ने घोषणा गरेका हुन् ।

स्वरेजले अब आफ्नो उरुग्वेका लागि अन्तर्राष्ट्रिय खेल आगामी शनिबार पराग्वेविरुद्धको खेल नै अन्तिम हुने बताएका छन् ।

स्वरेज अहिलेसम्म उरुग्वेका लागि सर्वाधिक गोलकर्तासमेत हुन् । उनले उरुग्वेका लागि अहिलेसम्म १४२ खेल खेल्दै ६९ गोल गरेका छन् ।

स्वरेजले १९ वर्षको उमेरमा २००७ मा उरुग्वेका लागि डेब्यु गरेका थिए । उनले २०१०, २०१४, २०१८ र २०२२ को विश्वकपसमेत खेलेका थिए ।

हाल इन्टर मियामीबाट व्यावसायिक फुटबल खेलिरहेका स्वरेजले क्लब फुटबललाई भने केही वर्ष निरन्तरता दिने छन् ।