माओवादीभित्र विद्रोह !

दैनिक नेपाल २०८१ साउन २८ गते ६:४४

काठमाडौं, २८ साउन । नेपाल कम्युनिस्ट पार्टी (माओवादी केन्द्र)को जारी स्थायी कमिटी बैठकमा पार्टी नेतृत्व हस्तान्तरणको बहसले प्रवेश पाएको छ । पार्टीको नाम, चुनावचिह्न फेर्नुपर्नेलगायतका विषय यसअघिका बैठकमा उठेको भए पनि यसपटक भने नेतृत्व हस्तान्तरणको विषयले पनि प्रवेश पाएको हो । माओवादी केन्द्रका उपमहासचिव जनार्दन शर्माले आइतबारको बैठकमा पार्टीको नाम, चुनावचिह्नका साथै पार्टी नेतृत्व हस्तान्तरणको प्रस्ताव गरेका हुन्, आजको राजधानी दैनिकमा खबर छ ।

माओवादी केन्द्रका अध्यक्ष पुष्पकमल दाहाल ‘प्रचण्ड’लाई पार्टीको नेतृत्व हस्तान्तरण गर्न सुझाव दिएका शर्माले १४ पृष्ठ लामो प्रस्ताव पेस गर्दै पार्टीको नाम र चुनावचिह्न पनि परिवर्तन गर्न भनेका छन् । पार्टी निर्माणका लागि विभिन्न काम गर्नुपर्ने भन्दै शर्माले ‘वर्तमान परिवेश र कामअनुरूप तालमेल हुनेगरी पार्टीको नाम परिवर्तन गर्ने, साथै आमजनताले सहज रूपमा स्वीकार गर्नेगरी चुनावचिह्न फेर्ने’ प्रस्ताव बैठकमा राखेका हुन् ।

यसैगरी, अध्यक्ष प्रचण्डलाई नेतृत्व हस्तान्तरण गर्न सुझाव दिँदै शर्माले भनेका छन्, ‘अध्यक्ष प्रचण्डको हालसम्मको योगदानलाई स्थापित गर्न बाँकी समय उहाँको भूमिकालाई सुनिश्चत गर्न वैचारिक काम र सत्ताको नेतृत्व गर्ने जिम्मेवारीसहित सांगठनिक क्षेत्रको भूमिका उहाँले चाहेको व्यक्तिलाई हस्तान्तरण गर्ने ।’ उपमहासचिव शर्माले अध्यक्ष प्रचण्डलाई संरक्षकको भूमिकामा रही वैचारिक प्राधिकार र सत्ताको नेतृत्व गर्न सुझाएका छन् । उनले भनेका छन्, ‘अध्यक्ष प्रचण्डले संरक्षकको भूमिकामा रही वैचारिक प्राधिकार र सत्ताको नेतृत्व गर्ने, हालका पदाधिकारीहरू सल्लाहकारको भूमिकामा रही विभागीय काम, अनुगमन, मूल्यांकन, स्कुलिङ, प्रशिक्षण गर्ने र तेस्रो तहका युवाहरूलाई कार्यकारी सांगठनिक नेतृत्व हस्तान्तरण गर्ने ।’

शर्माले हालको केन्द्रीय कमिटी भंग गरी प्रचण्डको संयोजकत्वमा महाधिवेशन आयोजक समिति बनाई महाधिवेशनमार्फत प्रत्यक्ष निर्वाचनबाट नयाँ नेतृत्व चयन गर्नेगरी मिति तोक्ने प्रस्तावसमेत राखेका छन् । बैठकमा उपमहासचिव शर्माले पार्टी अध्यक्ष प्रचण्डबाटै आफूविरुद्ध पार्टी विभाजनको हल्ला चलाइएको खुलासासमेत गरेका छन् ।

‘खुमलटारबाट फलानो एमालेमा जाँदै छ भनेर सुरु गरिएको प्रचारबाजीलाई बालुवाटार पुगेपछि तीव्रता दिइयो, सो प्रचारबाजीलाई मद्दत पुग्नेगरी पोखरामा आइपुग्दा मूल नेतृत्वले नै पार्टी फुटतिर उन्मुख छ, कसलाई साथ भन्दै कार्यक्रम हलमा हुटिङ गराएपछि सुन्नेहरूलाई पार्टी फुट्ने पक्कापक्की भयो भन्ने लाग्यो,’ शर्माले बैठकमा भनेका छन्, ‘देशभर यसको असर देखापर्न थाल्यो, फुटाउने कसले हो भन्दा बालुवाटारबाटै जनार्दनले हो भनेर भनिदिएपछि आज आमकार्यकर्ता र जनतामा पार्टी फुटको त्रास फैलिएको छ ।’

उनले आफूले नेतृत्वविरुद्ध केही प्रश्न गरेकै कारण यस्तो अफवाह फैलाइएको दाबी गरेका छन् । शर्माले भने, ‘मूल नेतृत्वबाटै यस प्रकारको गतिविधि हुनुको पछाडि केही प्रश्नहरू छन्, ती प्रश्नको जवाफ दिने झन्झटतिर लाग्नुभन्दा आमपंक्तिलाई तरंगित पार्ने विषय हालिदिएर ध्यान अर्कैतिर मोड्ने उद्देश्य रहेको छ, स–साना अन्तरविरोध समाधान गर्न झन् ठूलो अन्तरविरोध सिर्जना गरिदिनुपर्छ भन्ने अध्यक्षको मान्यताले काम गरेको छ ।’

यस्तै, शर्माले पार्टी नेतृत्वले खेलेको ऐतिहासिक भूमिका र जनताको योगदानबाट प्राप्त उपलब्धिमाथि नै प्रश्न उठ्न थालेको टिप्पणीसमेत गरेका छन् । उनले माओवादी र नेतृत्वप्रति विश्वास गरेर ‘जनयुद्ध’, जनआन्दोलनमा लागेका वर्गको दैनिक जीवनका समस्या समाधान गर्न नसक्दा समस्या आएको उल्लेख गरेका छन् । उनले अहिले माओवादी योजनाविहीन र संगठनविहीन अवस्थामा रहेको पनि बताएका छन् ।

माओवादीसँग आजको दिनमा संविधानबाहेक देखाउने केही अर्को उपलब्धि नै नरहेको शर्माको भनाइ छ । उनले माओवादीका एजेन्डाहरू दिनानुदिन खोसिँदै गएको र माओवादीलाई माया गर्ने वर्ग, जाति र समुदाय माओवादीकै निर्णय र व्यवहारले टाढिएको निष्कर्ष निकालेका छन् । ‘माओवादी पार्टी योजनाविहीन र संगठनविहीन बन्न पुग्यो, आज हामीसँग संविधानका अलावा न जनाधार छ, न संगठन छ,’ शर्माले भनेका छन्, ‘केही सीमित उपलब्धिबाहेक न कुनै देखाउनलायक कामहरू छन्, न हाम्रो कुनै मौलिक विकासको मोडेल छ, हाम्रा एजेन्डाहरू खोसिँदै जाँदा हामीलाई माया गर्ने वर्ग, जाति, समुदाय हाम्रो व्यवहार र निर्णयले टाढिएका छन् ।’