‘संगीतकार गुरुदेव कामतलाई राज्यले चिनेन’

काठमाडौं, २६ साउन । शास्त्रीय संगीतकार गुरुदेव कामतको श्रद्धाञ्जली सभा सम्पन्न भएको छ । शनिबार जमलस्थित नाचघरमा शोकसभा सम्पन्न भएको हो ।

सभामा कलाकार मदनदास श्रेष्ठले राजनीतिक दलको झण्डा बोक्नेले मात्र अवसर पाउने तर देशको लागि सोच्ने, योगदान दिने व्यक्तिको निधनले मर्माहत बनाएको बताउनुभयो । उहाँले देशमा गीत, संगीतलाई जोगाउने सर्जकहरुलाई सहयोग र उनीहरुको विकासको लागि राज्यले धेरै संस्थाहरु खोले पनि काम नभएकोप्रति दुःख व्यक्त गर्नुभयो ।

उहाँले भन्नुभयो, ‘हाम्रो देशमा गीत, संगीतलाई जोगाइराखेका सर्जकहरुलाई सहयोग र उनीहरुको विकासको लागि राज्यले धेरै संस्थाहरु खोलिएका छन् तर काम भएको छैन् । सबै सर्जकहरुले कुनै न कुनै राजनीतिक दलको झण्डा बोक्नुपर्ने र त्यस्ताले मात्र अवसर पाउने अवस्था छ । देशका लागि सोच्ने, योगदान दिने व्यक्तिको निधनले दुखित बनाएको छ ।’ राज्य र सरकारले यस्तो सर्जकहरुको लागि सोचेको भए कामतले अझै देशको लागि धेरै योगदान दिनसक्ने पनि उहाँको भनाई छ ।

कामतको बिहीबार बिहान निजी निवास सिरहामा निधन भएको हो । ६९ वर्षीय संगीतकार कामत लामो समयदेखि मिर्गौला पीडित हुनुहुन्थ्यो । मिर्गौलाको उपचार गराइरहनुभएका उहाँ आर्थिक समस्या भएपछि एक महिना अगाडि काठमाडौंबाट सिरहा घरमा पुग्नुभएको थियो ।

नेपाली गीत संगीत क्षेत्रमा ४० वर्षसम्म निरन्तर योगदान गर्नुभएका कामतको जन्म २०१२ साल साउन १७ गते सिरहामा भएको थियो ।