पोखरामा विद्यार्थी बोकेको स्कुल बस दुर्घटना

पोखरा, १४ साउन ।  पोखरा महानगरपालिका वडा नम्बर २१ को फुर्सेखोलामा एक स्कुल बस दुर्घटना भएको छ ।

सोमबार बिहान एलपी देवकोटा मेमोरियल इंग्लिस स्कुलको बस फुर्सेखोलाको घुम्तीमा सडकबाट करिब ६० मिटर तल खसेको प्रहरीले जनाएको छ ।

कास्की प्रहरीका सूचना अधिकारी डिएसपी वसन्तकुमार शर्माकाअनुसार दुर्घटना हुँदा बसमा २२ जना विद्यार्थी, एक चालक र एक सहचालक गरी कुल २४ जना सवार थिए ।

बिरौटास्थित विद्यालयका विद्यार्थीहरूलाई लिएर आउँदै गरेको ग १ क ६२१९ नम्बरको बस दुर्घटनामा परेको हो ।

घाइते विद्यार्थीहरूको तत्काल उद्धार गरी गण्डकी मेडिकल कलेज पृथ्वीचोकमा उपचारका लागि लगिएको छ । घाइतेहरूको अवस्था र दुर्घटनाको विस्तृत विवरण आउन बाँकी रहेको प्रहरीले जनाएको छ ।