कतारबाट पठाएको सुन अर्कैले लगेपछि …

दैनिक नेपाल २०८१ वैशाख १८ गते २२:४१

काठमाडौं, १८ बैशाख । वैदेशिक रोजगारीबाट घर फर्किँदा अर्काले पठाएको सुन बोक्नुभएका एक युवक कल्पनै नगरेको समस्यामा पर्नुभएको छ । प्रहरीले खोजी गरेर उहाँको उद्धार गरेपछि घटना बाहिर आएको हो ।

कतारबाट सोमबार त्रिभुवन अन्तर्राष्ट्रिय विमानस्थल ओर्लिनु भएका सप्तरीको राजविराज–१३ का सितेन्द्र यादव अपहरणमा पर्नुभएको हो । घर फर्कन लाग्दा उहाँलाई कतारमा बस्ने मनसुर अलीले २५ ग्राम सुन दिई काठमाडौं अवतरणपछि आफ्नो भतिज अजिम अलीलाई दिनु भनेका थिए । प्रहरीका अनुसार आफूलाई दिएको नम्बरमा काठमाडौं अवतरण लगत्तै सितेन्द्रले फोन गरे । फोन रिसिभ गर्ने व्यक्ति आए र सुन लिएर गए । तर, त्यो सुन लिन नजिम पुगेका थिएनन् ।

अजिमले सितेन्द्रलाई नियन्त्रणमा लिए र सिनामंगलस्थित आफू बस्ने डेरामा जबर्जस्ती ल्याए । बन्धक बनाए, कुटपिट गरे । उक्त सुनबापतको ४ लाख ८० हजार माग गरे । सितेन्द्रका साथमा भएको राहदानी र नगद १७ हजार ७ सय ४० रुपैयाँ खोसे ।

अजिमले सितेन्द्रकी श्रीमतीलाई फोन गरेर ४ लाख ८० हजार दिए मात्र छाड्ने धम्की दिए । यादव परिवार आत्तियो । उनीहरुले प्रहरीलाई खबर गरे । त्यसलगत्तै प्रहरी सक्रिय भयो । काठमाडौं उपत्यका अपराध अनुसन्धान कार्यालयको टोलीले मंगलबार बिहान सितेन्द्रलाई सिनामंगलबाट उद्धार गर्नुका साथै दुई जनालाई पक्राउ गरेको छ ।