काठमाडौं, ८ चैत । फिल्म ‘बोक्सीको घर’को गीत ‘जिन्दगीको कथा यता न उता’ सार्वजनिक गरिएको छ ।
केकी अधिकारीको निर्माण र अभिनय रहेको फिल्म ‘बोक्सीको घर’को गीतमा स्वीअरिती र निहारिकाको स्वर रहेको छ । जसमा सुलक्षण भारतीको शब्द सृजना र मनिष निरौलाको संगीत छ ।
गीतको भिडिओमा केकी र भारती फिचर्ड हुनुहुन्छ । सोसल–थ्रिलर जनरामा निर्माण भएको फिल्ममा बोक्सी कुप्रथाको नाममा महिलामाथि हुने हिंसाको कथा समेटिएको छ ।
केकी स्वयं शीर्ष भूमिकामा देखिएको बोक्सीको घरमा सुपला सापकोटा, स्वेच्छा राउत, सुलक्षण भारती, रमा थपलिया, सुष्मा निरौला र सविन बास्तोलाको अभिनय छ ।
भारतीको लेखन तथा निर्देशन रहेको फिल्मको निर्मातामा बद्री अधिकारी हुनुहुन्छ । कार्यकारी निर्माता राज घिमिरे हुनुहुन्छ । लोचन रिजालको ब्याकग्राउण्ड स्कोर रहेको फिल्ममा शिवराम श्रेष्ठको छायांकन र लोकेश बज्राचार्यको सम्पादन छ ।
फिल्म आगामी १४ वैशाखमा रिलिज मिति तोकिएको छ ।