काठमाडौं, २२ असोज । गैरआवासीय नेपाली संघ (एनआरएनए)को एसिया प्यासिफिक क्षेत्रीय संयोजकमा मलेसियाबाट हरिप्रसाद भट्टराईले उम्मेदवारी दिने घोषणा गरेका छन् ।
लामो समयदेखि एनआरएनएको अभियानमा रहेर काम गरेका भट्टराईले एनआरएनएको आसन्न ११औँ महाधिवेशनमा एसिया प्यासिफिक क्षेत्रीय संयोजकमा उम्मेदवारी दिने घोषणा गरेका हुन् ।
भट्टराई सन् २००७ देखि एनसीसी मलेसियाको सदस्य, २०१९ सम्म एनसीसी मलेसियाको सल्लाहकार र २०१९-२१ मा एनसीसी मलेसियाको अध्यक्ष भएर काम गरिसकेका छन् ।
यसैगरी भट्टराईले २०२१-२३ मा एसिया प्यासिफिक उपसंयोजक भएर पनि काम गरेका छन् ।
भट्टराईले अग्रजहरुको सल्लाह सुझाव तथा एनसीसी मलेसियाको निर्णयलाई मध्यनजर गर्दै आफूले आगामी कार्यकालका लागि उम्मेदवारी दिने निर्णय गरेको बताए । उनले एनआरएनएको एसिया प्यासिफिक क्षेत्रीय संयोजक भएर गैरआवासीय नेपालीहरुको हकहितका लागि काम गर्न विगतमा पाएको साथ र समर्थन यसपटक पनि पाउने विश्वास व्यक्त गरेका छन् ।