माधव नेपालको पार्टीमा पहिरो: नवलपुर जिल्ला अध्यक्ष, उपाध्यक्षसहित ३१ जनाले दिए सामूहिक राजीनामा

काठमाडौं, १३ असोज । नवलपुरमा माधव कुमार नेपाल नेतृत्वको नेकपा (एकीकृत समाजवादी) पार्टी रित्तिएको छ ।

नेकपा एसका जिल्ला अध्यक्षसहित ३१ जनाले सामूहिक रूपमा पार्टी परित्याग गरेसँगै जिल्लामा एकीकृत समाजवादी रित्तिएको हो । जिल्ला अध्यक्ष झबिलाल रानाको नेतृत्वमा चार पदाधिकारीसहित प्रदेश कमिटीका नेताहरूले पार्टी परित्याग गरेका हुन् ।

पार्टी परित्याग गर्नेमा अध्यक्ष रानासहित जिल्ला कमिटीका उपाध्यक्ष प्रेमनारायण पाण्डे, उपसचिव हुमकान्त पराजुली, उपसचिव गोबिन्द सुनार रहेका छन् ।

पार्टीको नवलपुर जिल्ला भूगोलमा रहेर विभिन्न कमिटि र जनवर्गिय संगठनको जिम्मेवारी भूमिकामा रहेकाहरूले पार्टीको केन्द्रीय कमिटि र गण्डकी प्रदेश कमिटिमा गराईएको ध्यानाकर्षणका सम्वन्धमा कुनै सुनुवाई, छलफल, निर्णयसमेत नभएकाले पार्टीमा रहिरहनुको औचित्य समाप्त भएको विज्ञप्ति जारी उल्लेख गरिएको छ ।

कम्युनिष्ट विचारधाराबाट भने विचलन नहुने प्रतिवद्धता तर एसको साधारण सदस्य समेत नरहने गरी सामूहिक रूपमा पार्टी परित्याग गरेको जनाइएको छ ।