एक जना किशोरी र तीन जना बालिकालाई बलात्कार गर्नेहरू पक्राउ

काठमाडौं, १८ साउन । उदयपुरमा एक जना किशोरी र भक्तपुर र पाल्पामा तीन जना बालिका बलात्कृत भएका छन् ।

किशोरी र बालिकासहित चार जनालाई बलात्कार गर्ने तीन जा अभियुक्तलाई प्रहरीले पक्राउ गरेको छ ।

जस अनुसार उदयपुरमा १८ वर्षीया किशोरीलाई बलात्कार गरेको अभियोगमा बेलका नगरपालिका–७ बस्ने २० वर्षीय मनोज शाशंखरलाई बुधबार दिउँसो प्रहरीले पक्राउ गरेको हो ।

मनोजले ती किशोरीलाई सोमबार राति सुतिरहेको कोठामा प्रवेश गरी डर त्रास देखाई जबरजस्ती करणी गरेको प्रहरीले जनाएको छ ।

यस्तै, भक्तपुरमा १२ वर्षीया बालिकालाई बलात्कार गर्ने रूकुम मुसिकोट नगरपालिका–३ घर भई काठमाडौं नयाँबानेश्वर थापागाउँ बस्ने १९ वर्षीय बिबेक केसीलाई पनि बुधबार दिउँसो प्रहरीले पक्राउ गरेको छ ।

केसीले ती बालिकालाई साउन ४ गतेदेखि ललाई फकाई पटक–पटक बलात्कार गर्दै आएका थिए ।

त्यस्तै, पाल्पामा ११ र १३ वर्षीया बालिकालाई बलात्कार गर्ने तानसेन नगरपालिका–८ पाँडेखर्क बस्ने २२ वर्षीय बिशाल ठडराईलाई बुधबार दिउँसो प्रहरीले पक्राउ गरेको छ ।

बिशालले बालिकालाई आइतबार बिहान जबरजस्ती करणी तथा सोही दिन दिउँसो जबरजस्ती करणी उद्योग गरेको प्रहरीले जनाएको छ ।

सबै घटनाका सम्बन्धमा प्रहरीले थप अनुसन्धान गरिरहेको बताएको छ ।