खोपको पहुँचबाहिर रहेकालाई जनप्रतिनिधि र दलले सहजीकरण गर्नुपर्छ : अध्यक्ष तिमिल्सिना

काठमाडौं, १९ फागुन । राष्ट्रिय सभा अध्यक्ष गणेशप्रसाद तिमिल्सिनाले कोभिड–१९ विरुद्धको खोप पहुँचबाहिर रहेका जनतालाई खोप लगाउन जनप्रतिनिधि र राजनीतिक दलले सहजीकरण गर्नुपर्ने बताएका छन् ।

काठमाडौंमा हिजो बुधबार आयोजित ‘कोभिड–१९ विरुद्धको खोपसम्बन्धी जोखिम सञ्चार तथा सामुदायिक सहभागिता’सम्बन्धी एक दिने अन्तर्क्रिया कार्यक्रमको उद्‌घाटन सत्रमा उनले १३ प्रतिशत नागरिकले खोप लगाउन नमानेको भन्ने रिपोर्ट आएको र केही पहुँच बाहिर रहेकाले जनप्रतिनिधिले पनि खोपको पहुँचमा ल्याउन सहयोग गर्नुपर्नेमा जोड दिएका हुन् ।

राष्ट्रिय सभामा चार वर्षे कार्यकाल बाँकी रहेका तथा नवनिर्वाचित सदस्यहरू सहभागी कार्यक्रममा अध्यक्ष तिमिल्सिनाले भने, ‘करीब १३ प्रतिशत जनसंख्या खोप लगाउन नमानिरहेको भन्ने कुरा छ । यो भ्रमका कारणले हुन सक्छ । यसमा हामीले जनतालाई सचेत गराएर खोप अभियानमा सहभागी गराउन हामी जनप्रतिनिधिको महत्वपूर्ण भूमिका रहन्छ ।’

राष्ट्रिय सभामा निर्वाचित भएर आएका नयाँ सदस्यहरूलाई बधाई तथा स्वागत गर्दै अध्यक्ष तिमिल्सिनाले चैत मसान्तसम्म सरकारले सबै जनतालाई खोप लगाउने लक्ष्य लिएकाले त्यसलाई सफल बनाउन आ–आफ्नो ठाउँबाट भूमिका खेल्न आग्रह गरे ।

‘अब स्थानीय चुनाव आउँदैछ । पार्टीका कार्यक्रममा स्वास्थ्यलाई पनि प्रथामिकता दिनुपर्छ,’ उनले भने, ‘राजनीतिक दलहरुले चुनावमा भोट माग्ने कामसँगै खोप लगाउनसमेत जनतालाई हात जोडेर अनुरोध गर्न म अनुरोध गर्दछु ।’