एमालेलाई उपयोग गर्ने कांग्रेस माओवादीको दाउपेचबाट सजग छौँः नेता भट्टराई

काठमाडौँ, १३ फागुन। नेकपा एमालेका स्थायी कमिटी सदस्य डा.राजन भट्टराईले आफूहरुलाई उपयोग गर्ने कांग्रेस माओवादीको दाउपेचबाट एमाले सजग रहेको बताएका छन । विकसित राजनीतिक घटनाक्रमका सम्बन्धमा संक्षिप्त प्रतिक्रिया दिँदै भट्टराईले गठबन्धन कायमै राखेर एमालेसँग दुवै पार्टीले गरेको संवादले कुनै निष्कर्ष ननिस्कने बताए ।

‘राजनीतिक वृतमा एमालेको भूमिकालाई लिएर अनेक प्रकारका अनुमान र चर्चा भए पनि स्थितिमा वदलाव आएको छैन,’ भट्टराईले भने, ‘संसद सञ्चालनका लागि हामीले उठाएका माग जबसम्म पुरा हुँदैनन् तबसम्म एमालेका लागि अरु विषय महत्वका होइनन् ।’

भट्टराईले एमालेसँग सार्थक संवाद र सहकार्यका लागि प्रधानमन्त्री शेरबहादुर देउवाले गठबन्धन तोड्ने आँट गर्नुपर्ने भट्टराईको भनाइ छ । माओवादीले पनि सरकार छोडेर सडकमा आए नयाँ शिराबाट छलफल हुन सक्ने उनको भनाइ छ ।

‘माओवादीसँग औपचारिक रुपमा हिजोबाट संवाद सुरु भएको छ,’ भट्टराईले भने, ‘तर अहिलेसम्मको स्थिति हेर्दा दुवै पार्टी गठबन्धन कायमै राखेर एमालेसँग खेल्न खोजेको देखिन्छ । त्यो दाउपेचका विषयमा एमाले सजग छ ।’