पश्‍चिमी वायुको प्रभावका कारण केही स्थानमा हिमपातको सम्भावना

काठमाडौं, ८ पुस । पश्‍चिमी वायुको प्रभावका कारण आज बिहीबार देशका केही स्थानमा हिमपातको सम्भावना रहेको मौसम पूर्वानुमान महाशाखाले बताएको छ ।

हाल देशमा पश्चिमी वायुको आंशिक प्रभाव परिरहेका कारण चिसो बढ्नाका साथै देशका विभिन्न स्थानमा हिमपात भइरहेको महाशाखाको भनाइ छ । महाशाखाका अनुसार आज दिउँसो देशका पहाडी भूभागमा आंशिक बदली रही बाँकी भूभागमा सामान्यतया मौसम सफा रहने छ ।

त्यस्तै प्रदेश १, बागमती र गण्डकीका हिमाली क्षेत्रका एक वा दुई स्थानमा हल्का हिमपातको सम्भावना छ ।

राति सुदूरपश्चिम तथा अन्य प्रदेशका पहाडी भूभागमा आंशिक बदली रही बाँकी भूभागमा सामान्यतया मौसम सफा रहने छ । देशका उच्च पहाडी र हिमाली क्षेत्रका थोरै स्थानमा हल्का हिमपातको सम्भावना छ ।

शुक्रबार पहाडी भूभागमा आंशिक देखि सामान्य बदली रही बाँकी भूभागमा सामान्यतया मौसम सफा रहने छ । उच्च पहाडी तथा हिमाली क्षेत्रका थोरै स्थानमा हल्का हिमपातको सम्भावना रहेको बताइएको छ ।