काठमाडौँ, ९ मंसिर । नेकपा एमालेले पार्टीको १० औँ राष्ट्रिय महाधिवेशनमा विभिन्न देशका अतिथिहरु सहभागी हुने भएका छन् ।
एमालेले बिहीबार महाधिवेशनमा आउने पाहुनाहरुको नामावली सार्वजनिक गरेको छ ।
एमालेको विदेश मामिला प्रमुख तथा महाधिवेशनका अतिथि सत्कार समितिका संयोजक डा. राजन भट्टराईले काठमाडौंमा गरिएको पत्रकार सम्मेलनमा ४ देशका १५ जना अतिथि महाधिवेशनमा सहभागी हुने जानकारी दिए ।
भट्टराईका अनुसार भारतबाट ७ जना, कम्बोडियाबाट ४ जना, बंगलादेशबाट ३ जना र श्रीलंकाबाट १ जना अतिथि महाधिवेशनमा सहभागी हुनेछन् । काठमाडौं आइपुगेका केही अतिथिलाई उनले सोल्टी होटलमा रात्रीभोजको समेत आयोजना गरेका छन् ।
ती अतिथिहरुले उद्घाटन सत्रका दिन शुभकामना दिनेछन् भने मंसिर १२ गते एमाले अध्यक्ष केपी शर्मा ओलीले उनीहरुसँग संयुक्त रुपमा ब्रेकफास्ट मिटिङ गर्ने कार्यक्रम तय भएको छ । विदेशी पाहुनाहरुलाई चितवनको ग्रीन मेनसन जंगल रिर्सोटमा बसोबासको व्यवस्था मिलाइएको छ ।
यसैबीच एमाले महाधिवेशनका लागि विश्वका १५ देशका कम्युनिष्ट पार्टीहरुले शुभकामना सन्देश पठाएका छन् ।
प्रतिक्रिया