प्रतिनिधिसभा विघटनविरुद्ध परेका सबै रिट खारेज हुनुपर्छ : प्रधानमन्त्री

काठमाडौं, २६ पुस । प्रधानमन्त्री केपी शर्मा ओलीले प्रतिनिधिसभा विघटनविरुद्ध परेका सबै रिट निवेदन खारेज हुनुपर्ने बताएका छन् ।

आफूसँग ६४ प्रतिशत बहुमत रहेको दाबी गर्दै प्रधानमन्त्री ओलीले यस्तो बताएका हुन् । आइतबार राष्ट्रियसभाको बैठकलाई सम्बोधन गर्दै प्रधानमन्त्री ओलीले ३६ प्रतिशतलाई ५१ प्रतिशत बनाउन निकै गाह्रो भएको भन्दै प्रतिनिधिसभा विघटनविरुद्ध परेका सबै रिटलाई सर्वोच्च अदालतले खारेज गर्नुपर्ने तर्क गरेका हुन् ।

संविधानमा उल्लेखित प्रावधानअनुसार नै आफूले प्रतिनिधि सभा विघटनको सिफारिस गरेको जिकिर गर्दै ओलीले अब कुनै पनि हालतमा प्रतिनिधिसभा पुनस्र्थापना नहुने भएकाले सबै राजनीतिक दलहरुलाई निर्वाचनको तयारीमा जुट्न समेत आग्रह गरेका छन् ।

प्रधानमन्त्रीको सिफारिस राष्ट्रपतिले अनुमोदन गरेको भन्दै उनले त्यस विषयमा राष्ट्रपतिलाई विवादित बनाउन नमिल्ने समेत बताएका छन् ।

अहिलेको सरकार संविधानको धारा ७६ को १ अनुसार बनेको सरकार भएको भन्दै उनले जति कराए पनि जति चिच्याएपछि प्रतिनिधि सभा पुनर्स्थापना हुन नसक्ने दाबी गरेका हुन् ।

प्रधानमन्त्रीले विघटनको सिफारिस गर्न पाउँदैन भन्ने कुरा संविधानमा कहीँ पनि उल्लेख नभएको भन्दै उनले यो राजनीतिक विषय भएकाले सर्वोच्चले समेत आफूले गरेको निर्णयविरुद्ध परेका सबै रिटलाई खारेज गर्नुपर्ने प्रधानमन्त्री ओलीको भनाइ छ ।