बैतडीमा बलात्कृत १७ वर्षीया किशोरीको उद्धार, आरोपित पक्राउ

काठमाडौँ, २३ भदौ । बैतडीको सिगासकी १७ बर्षीया बलात्कृत किशोरीको उद्धार गरिएको छ । ती किशोरीलाई प्रहरीले उद्धार गरेको हो ।

उनीमाथि विद्यालयमै पढाउने शिक्षक र अहिले गाउँपालिकामा कार्यरत कर्मचारीले पटक पटक बलात्कार गरेको आरोप लागेपछि प्रहरीले उद्धार गरेको जिल्ला प्रहरी कार्यालयले जानकारी दिएको छ ।

प्रहरीले घटनाका बारेमा बुझ्ने काम भइरहेको र घटनामा संलग्न कसैलाई पनि नछोडिने बताएको छ ।

पीडित किशोरीसँगै उनका श्रीमान र एकजना दाजु समेत सदरमुकाम पुगेका छन् ।

बिहे गरेको ६ महिनामै किशोरीले बच्चा जन्माएपछि उनीमाथि बलात्कार भएको खुल्न आएको हो । पहिले गाउँमै मिलाउन खोजेकाले प्रहरी समक्ष ढिलो गरी आइपुगेको बताइएको छ ।

पीडित किशोरीलाई जिल्ला अस्पतालको एकद्वार संकट व्यवस्थापन केन्द्रमा राखिने प्रहरीले जनाएको छ ।

किशोरीलाई शिक्षक खडकबहादुर बोहरा, गाउँपालिकामा कार्यरत केशव बोहरा र स्थानीय रामसिंह बोहराले पटकपटक बलत्कार गरेको आरोप लागेको छ ।

आरोपित मध्ये खडक र रामसिंह बोहरालाई नियन्त्रणमा लिएको इलाका प्रहरी कार्यालय पाटनका प्रहरी निरीक्षक गौरीप्रसाद जैशीले जानकारी दिए । अर्का आरोपितको खोजी भइरहेको जैशीले जनाए ।

किशोरीलाई ललाईफकाई गरेर करणी भएको भएपनि कानुन अनुसार कारवाही हुने प्रहरीको भनाइ छ ।