बाँकेमा थप एक जनामा मृत्युपछि कोरोना पुष्टि

काठमाडौँ, २३ भदौ । बाँकेमा थप एक जना कोरोना संक्रमितको मृत्यु भएको छ ।

मृत्यु हुनेमा नेपालगञ्ज उपमहानगरपालिका १६ की ८० वर्षीया महिला रहेकी छन् ।

उनको नेपालगञ्ज मेडिकल कलेजमा उपचारको क्रममा मंगलबार मृत्यु भएको हो ।

मृत्युपछि गरिएको परीक्षणमा उनमा संक्रमण देखिएको हो । सोमबार स्वाब लिइएको उनको मंगलबार रिपोर्ट आएको हो । मृतक लामो समयदेखि मधुमेह र उच्च रक्तचापको बिरामी रहेकी थिइन् ।

भदौ २१ गते अस्पताल भर्ना भएकी उनको दुवैतिरको फोक्सोमा निमोनिया रहेको अस्पतालले विज्ञप्तिमार्फत जनाएको छ । यससँगै बाँकेमा कोरोनाका कारण ज्यान गुमाउनेको संख्या ८ जना पुगेको छ ।