काठमाडौं, ९ साउन । नेपाली कांग्रेसका शुभेच्छुक एवम् समाजसेवी विजय केसीलाई ‘कोभिड–१९ हिरो’ अवार्ड प्राप्त भएको छ ।
अमेरिकामा रहेका नेपालीहरूको संस्था ‘हामी नेपाली’ले केसीलाई ‘कोभिड–१९ हिरो’ अवार्ड प्रदान गरेको हो । समाजसेवी केसीले कोरोना भाइरसका क्रममा भक्तपुरसहित राजधानीमा बसोबास गर्ने अति विपन्न व्यक्ति तथा परिवारहरूलाई उद्धार तथा सहयोग गरेको भन्दै हामी नेपालीले सो अवार्ड प्रदान गरेको छ ।
लकडाउनका बेला केसीले आफ्नै गृहजिल्ला भक्तपुरमा खाद्यान्नसहितका राहत वितरण गरेका थिए ।
उनले काठमाडौं उपत्यकामा लकडाउनले समस्यामा परेकाहरूलाई खाद्यान्न वितरणदेखि विभिन्न खालका सहयोगहरू गरेका थिए ।
नेपाली कांग्रेसप्रति शुभेच्छा र आस्था राख्ने केसी समाजसेवामा सक्रिय छन् । उनी सक्रिय राजनीतिमा छैनन् । तर, समाज सेवामा उनको सक्रियता निरन्तर रहेको छ ।
अमेरिकामा रहेका नेपालीहरूले नेपालमा कोराना भाइरसको संक्रमण र लकडाउनमा विशेष कार्य गरेकाहरूलाई हौसला प्रदान गर्न ‘कोभिड–१९ हिरो’ अवार्ड प्रदान गर्दै आएको छ ।