जेल नजान धनाड्य छोराको ‘अस्पताल नौटंकी’

अभिनेत्री परमिता राणासहित अर्का जोडी लिएर मदिरामा मस्तराम भएका मल्लको नाटकसँग कारागार व्यवस्थापन विभाग सशंकित

दैनिक नेपाल २०७६ फागुन १४ गते १२:३६

काठमाडौं, १४ फागुन । गएको मंसिरमा बुढानिलकण्ठमा मदिरामा लठ्ठीएर कारले ठक्कर दिएर महिलाको मृत्यु प्रकरणका दोषी राजधानीका धनाड्य परिवारका पृथ्वी मल्ल जेल नजान ‘अस्पताल नौटंकी’मा उत्रिएका छन् ।

जिल्ला अदालत काठमाडौंले डिल्लिबजार कारागार चलान गरेका मल्ल डेढ महिनादेखि अस्पतालमा बिरामीको नाटक गरेर बसीरहेका छन् । उनको यस्तो नौटंकिविरुद्ध कारागार व्यवस्थापन समितिले मेडिकल काउन्सिललाई पत्र लेखेको छ भने सम्बन्धित अस्पताललाई पनि कारबाहीका लागि सिफारिस गरेको छ ।

मल्लको अस्पताल बसाई पत्याउन लायक नरहेको कारागार व्यवस्थापनको ठम्याई छ । ब्लड प्रेसर रोगीको ढोंगमा मल्ल अस्पतालमा रजगज गरिरहेको बताइएको छ ।

मल्ल, उनकी नजिककी साथी भनिएकी अभिनेत्री परमिता राणा, करिश मास्के र एलिना थापा सवार बा१४च ६१२३ नम्बरको कारले २८ मंसिरमा विष्णुमति बस्ने गोरखाकी लीला देवकोटालाई बुढानिलकण्ठ–५ मा ठक्कर दिएको थियो । देवकोटाको मृत्यु भएपछि मल्ललाई जेल पठाउने आदेश भएको थियो ।

जिल्ला अदालत, काठमाडौंले यो प्रकरणमा मल्ललाई सवारी ज्यानसम्बन्धी कसूरमा २३ पुसमा पुर्पक्षका लागि थुनामा पठाउने आदेश दिएको थियो ।

अभिनेत्रीसहित चार जनाले दरबारमार्ग, ठमेलमा अत्यधिक मदिरा सेवन गरी बुढानिलकण्ठ भन्दा माथि रहेको रिसोर्टमा खाना खाएको विवरण सार्वजनिक भएको थियो ।