लण्डन, ४ माघ । इंग्लिस क्लब लिभरपुलका प्रशिक्षक जर्गेने क्लोपले अफ्रिका कप अफ नेशन फुटबलको मिति जनवरीमा सारिनु आफ्नो क्लबका लागि विनाश सरह रहेको बताएका छन् ।
आउँदो वर्ष हुने अफ्रिका कप अफ नेशन फुटबल जुन–जुलाईमा हुने भनिएकोमा आयोजक राष्ट्र क्यानमरुनले सो समयमा मौसम उपयुक्त नहुने भन्दै जनवरीमा सारिएको जनाएको छ । अफ्रिका कप अफ नेशन आउँदो वर्षको जनवरी ९ देखि सुरु हुनेछ ।
यसको अर्थ इंग्लिस प्रिमियर लिगसहित विश्वका शीर्ष लिगहरुको आउँदो सिजनको मध्य तिरका खेलमा अफ्रिकन खेलाडी टिममा उपलब्ध हुने छैनन् ।
अफ्रिकी खेलाडीमा भर परेका क्लबहरुका लागि लिगका महत्वपूर्ण खेलमा पहिलो रोजाइका खेलाडी गुमाउनु पर्ने अवस्था आउने भएको हो ।
हाल प्रिमियर लिगको शीर्ष स्थानमा रहेको लिभरपुलका महत्वपूर्ण खेलाडीहरु अफ्रिकन छन् । सेनेगलका साडिओ माने, इजिप्टका मोहम्मद सालह र गिनीका नाबी केइता आउँदो सिजनको मध्यमा टिममा नहुने भएका हुन् ।
प्रशिक्षक क्लोप्पले भनेका छन्, ‘चार हप्तासम्म हामीसँग महत्वपूर्ण खेलाडी हुने छैनन् । क्लबका रुपमा हामीले यसबारे सोच्नु पर्ने हुन्छ । यसले अफ्रिकन खेलाडीलाई हित गर्दैन ।’