बिहीबार, २ असोज २०७६
DainikNepal.com
बिहीबार, २ असोज २०७६

सीएमसीमा नि:शुल्क डेङ्गु परीक्षण सुरु

दैनिक नेपाल २०७६ भदौ २६ गते १२:४३

चितवन, २६ भदाै । चितवन मेडिकल कलेज शिक्षण अस्पताल (सीएमसि)ले विपन्न, गरिब बिरामीहरुको नि:शुल्क डेङ्गु परीक्षण सुरु गरेको छ ।

अस्पतालको ईर्मेजन्सी कक्षमा अस्पताल निर्दैशक प्रोफेसर डा. दयाराम लम्साल र अस्पताल जनसमपर्क अधिकृत हरि बोहराले भरतपुर १० का भरत लामालाई डेङ्गु परीक्षण गर्ने किट हस्तान्तरण गर्दै सीएमसीमा नि:शुल्क डेङ्गु परीक्षण सुरु गरेका हो ।

देशैभर डेङ्गु फैलिरहेको बेलामा स्थानीय सरकार भरतपुर महानगर र चितवन प्रशासनको अनुरोधलाई ध्यानमा राख्दै अस्पतालको सामाजिक अभियान अन्तर्गत नि:शुल्क डेङ्गु परीक्षण गर्ने काम थालिएको अस्पतालका अध्यक्ष तथा प्रबन्ध निर्देशक प्रोफेसर डा. हरिश्चन्द्र न्यौपानले जानकारी दिए ।

नियन्त्रणमा सहयोग पुर्‍याउने उद्देश्यले एक हजार जना विपन्न वर्गहरुलाई नि:शुल्क डेङ्गु परीक्षण गराइने अस्पातलका निर्देशक डा. दयाराम लम्सालले जानकारी दिए ।

‘अहिले डेङ्गु र ज्वरोको महामारी रहेकोले त्यस्ता बिरामीहरु जो अस्पातल आउने सकेका छैनन् उनीहरुलाई लक्षित गरेर यो सेवा प्रदान गर्न लागेका हौ उनले भने’, कोही पनि बिरामी नछुटुन् भनेर नै हामीले अहिलेलाई एक हजार जना गरीब तथा विपन्न वर्गलाई नि:शुल्क डेङ्गु परीक्षण र परामर्श दिन लागेका हौ ।’

सरकारले बनाएको विपन्न वर्गको मापदण्ड अनुसार नै बिरामीलाई यो सेवा प्रदान गरिने उनले बताए । यस्तै, विपन्न वर्ग भनी प्रमाणित गर्ने सिफारिस ल्याउन नसक्ने बिरामीहरुलाई अस्पातलले नै मूल्याङकन गरेर यो सेवा प्रदान गरिने उनले बताए ।

अझै पनि कतिपय डेङ्गु संक्रमितहरु गरीब र विपन्न वर्गको भएकै कारण अस्पातलसम्म आउन नसकेकोले त्यस्ता वर्गहरुलाई लक्षित गर्दै यो कार्यक्रम शुरु गरिएको उनको भनाई छ ।

‘अहिले सबै अस्पातलहरु डेङ्गु र भाईरल ज्वरोको बिरामीहरुले भरिएका छन्, उपचारको लागि अस्पातलका बेडहरु भरिएका छन्’, उनले भने’, तर अझै पनि कति गरीब तथा विपन्न वर्गका मानिसहरुमा डेङ्गुको संक्रमण भएपनि अस्पातल आउन सकेका छैनन्, त्यसैले त्यस्ता वर्गलाई लक्षित गरेर यो कार्यक्रम शुरु गर्न लागिएको हो ।’ अस्पातलहरु भरिएता पनि अझै धेरै बिरामी छुटेको आशंका रहेको उनले बताए ।

मनसुन र पोस्ट मनसुनमा पनि डेङ्गुको संक्रमण बढ्न सक्ने भएकोले अझै २ महिनासम्म यसको प्रकोप रहन सक्ने उनले बताए । सरकारले गरिरहेको सबै प्रयासका बाबजुत पनि अझै कार्तिकसम्म डेङ्गुको प्रकोप घट्ने सम्भावना नरहेकोले नियन्त्रणमा सहयोग पुर्‍याउन यो सेवा शुरु गरिएको डा. लम्सालले बताए ।

‘चाहन्छौ हामी एक हजार जनालाई पनि प्रभावित नहोस्, छिट्टै नियन्त्रण होस्’, उनले भने’, तर, विगतको जुन अनुभव छ त्यसले चाँही यो समस्या छिट्टै नियन्त्रणमा आउछ कि आउँदैन भन्न सक्ने अवस्था छैन ।’ भर्खर मनसुन सकिएको र पोस्ट मनसुनसम्म पनि चानाखो हुनु पर्ने उनको भनाई छ ।

अहिले दैनिक ४ सय देखी ५ सय बिरामीहरु अस्पातल आउने र तीमध्ये अधिकांशमा डेङ्गु संक्रमण देखिने गरेको अस्पतालको रेर्कडमा उल्लेख छ ।

प्रतिक्रिया
सम्बन्धित